10月4日，部份時間有陽光，天氣酷熱，下午局部地區有驟雨及雷暴。美國8月職位空缺大幅回升至961萬份，10年息衝上4.81%，美股三大指數回落，道指跌430點，標指跌58點，失守4300重要支持，納指亦跌248點。VIX升穿19，恐慌情緒升溫，目前環球焦點均落喺10年債息身上。目前標指平均市盈率為24倍，回報率為4.16倍，低於10年債息4.81%，令美股短期下跌壓力增加。
目前市場對息口走勢睇法分成兩派，對沖基金自惠譽喺8月中下調美債評級後，大大力沽空美債，賭佢美國赤字增加，債務高企，加上9月份工會罷工，沽空嘅對沖基金認為此舉將拖垮美國經濟，全球最大對沖基金橋水認為，美國要將通脹壓抑至3%問題不大，但若然美聯儲堅持要實現2%通脹率，必然要繼續加息，經濟或需要付出沉重代價。
兩另一個市場睇法係以細摩為首嘅傳統資產管理基金，表示目前開始要建立美債長倉，理據係美國經濟明年增長將放緩至1.1%，通脹則回落至3%水平，當經濟急速放緩，明年聯儲局就會開始減息，幅度為每次25點子，一共減四次，所以目前係買入美債嘅最佳時機。
實際情況係目前美國經濟無以前預期咁差，主要係疫情期間美國實行貨幣寛鬆政策，美國政府大灑金錢，民眾手頭鬆動，美股自然節節上升。雖然過去幾季美企盈利有所倒退，但實際業績都好過期，呢個亦係支持美股由舊年10月底位，標指由3500升至早前4600水平，PE高位達26倍，唔少股份股價更升一兩倍，目前相對美股嘅吸引力，已不及美債息嘅4.6%，呢個正正係美股近日開始作出較大幅度回調嘅原因。
至於港股真係不提也罷，假期前挾淡倉，單日升400幾點，但噚日假後返嚟又走樣，恒指跌500點打回原形都唔止，更創今年低位。雖然隔晚美股急跌，但ADR及夜期未有跟足美股跌幅。雖然今早黑期靠穩，但噚日回補去年11月29日裂口17300後，未能重返17500水平，估計今日港股繼續偏軟，短線下試17000心理關口，17000水平好友將力守，不過反彈力有限，之前嘅17300至17400支持，將成為今日即市反彈阻力。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。