港股千點上落足以玩死散戶
9月1日，部份時間有陽光，有幾陣驟雨及雷暴，日間局部地區雨勢較大，天氣炎熱。美股仲未識反彈，隔晚三大指數下跌，道指跌280點；標指跟納指刀別跌31點及66點。總結喺8月份，美股三大指數皆跌逾4%。
其實已經一段時間，聯儲局嘅唔少官員都係立場偏鷹，只係之前美股充斥過份樂觀情緒，市場漠視官員嘅鷹派言論。不過上周五鮑爺喺Jackson Hole年會上再次放鷹，一盤冷水向住美國投資者照頭淋，令市場資金唔敢再放肆risk on。實際上美國經濟仍有下調壓力，加上面對高通脹，聯儲局兩害取其輕，鮑爺都講到明為咗要控制通脹，加息帶嚟嘅短暫痛苦係難免。
隔晚公布小非農數據，連續兩個月偏軟，新增職位只有13.2萬份，較上月的27萬份大幅減少。之前已有唔少企業表明停止招聘，甚至要裁員，呢個數字都預咗唔會好得去邊，未來非農數字有機會進一步受壓。喺新增職位減少同時，薪金喺高通脹下則維持高水平，企業面對如此狀況，即使用少咗人，人工成本都好難有得減，經營環境惡劣，營運能力較弱嘅中小型企業，有機會被淘汰。不過向來大小非農難免有差，等埋周五嘅大非農數字，係咪一樣偏軟。
港股仍然係日升日跌，甚至係上下半場升跌有異，噚日早段港股裂口低開，但成交繼續薄弱，雖然噚日大市喺19500水平似有支持回彈，全日成交更增至1365億元，但噚日係MSCI調整，並唔係真正成交增加配合反彈，千祈咪興奮得太早，今日成交隨時又打回原形。港股暫時無大方向，就喺19200至20200之間上落，多人睇淡大戶就挾淡倉，挾到咁上下又玩回馬槍，雖然波幅只有一千點，但單日又上又落，已夠玩死炒指數嘅散戶。由於股票難炒，唔少散戶轉向炒指數搵食，只不過喺成交薄弱下，大戶要操控指數更加得心應手，散戶搵食只有更艱難。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。