港股即使回補裂口都唔死得
12月23日，多雲，間中有幾陣雨，天氣稍為回暖，聖誕期間暖返啲，到下星期大除夕明顯轉冷，不過家下要留家抗疫，天氣再凍都無乜影響。美國國會通過財政刺激方案，本來對市場嚟講係利好消息，可惜疫情喺歐美爆到七彩，美股個別發展。道指唔見兩舊，暫時險守三萬點，報收30015點，標指亦跌7點收市，不過納指再創收市新高，升65點報收12807點。
睇返港股呢邊，港股呢個月跟屢創新高嘅美股表現差得遠，暫時恒指仍然喺26000至27000之間上落，但噚日港股繼續腳軟，恒指一度失守二萬六關，雖然尾市跌幅收窄，二萬六點力保不失，但恒指收市再跌187點。以圖論勢，圖表派當然口淡淡，上周恒指10日線跌穿20日線，係一個明顯利淡訊號，再加上恒指喺呢個月一直窄幅上落，落下落下已接近11月上旬嘅上升裂口25800至26000點水平，短線唔排除補一補呢個裂口，若然裂口回補兼失守，淡友又會大聲疾呼恒指完成圓頂派發，要向下考驗25000，甚至24000點。
不過古天后又唔係咁睇，即使短線恒指借聖誕節假期前後，市況轉為淡靜而回補25800至26000點裂口也好，只要裂口回補完後，重返二萬六水平，港股都係安然無恙，真係唔需要太擔心，只係長假期不宜重倉渡假期，無謂令自己放假期間亦心掛掛。睇返呢個月港股成交持續縮減，實際沽壓有限，目前只係短期整固，完全見唔到散水冧棚跡象。尤其明年數目龐大嘅中企及中概股排住隊嚟港股上市，阿爺定必出手維穩，皆因港股仍然肩負中企海外融資重任，港股邊可以冧檔死人。
雖然呢期全球疫情再惡化，米字旗國更驚現變種病毒，但疫苗面世並於多國開始應用，預期明年首季疫情可某程度上受控。加上各國央行因應疫情繼續放水，支持經濟復甦，喺資金充裕得過份下，市場流動性理想，對股市當然有利，對於呢期港股調整，真係唔使太擔心。古天后都幾肯定，一旦恒指真係殺落二萬五，資金定必湧入撈貨。
講返目前港股主要風險有幾個，包括喺下月拜登正式入主白宮前，一直唔認輸嘅侵侵唔知會唔會玩嘢；另一個重大風險當然係米字旗國嘅變種病毒，未知疫苗能否有效預防，亦未知變種病毒嘅威力如何，會否影響到明年經濟復甦進度。至於拜登入主白宮後，會否對中國政策有所改變亦係另一變數，當然大家都希望拜登會實行對中國較溫和嘅政策，只不過佢上任後，首要任務係應付疫情，中國問題都要擺埋一邊，即係短期中美關係唔會有太大進展，千祈唔好抱咁大期望
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。