港股即使短期見底 只維持區間上落難突破
2月25日，大致天晴，早上仍然寒冷，中午氣溫有所回升，日夜溫差較大。俄羅斯正式向烏克蘭開火，引發全球股市大幅波動，美股隔晚又嚟過山車，早段急挫後回穩，尾市倒升，道指升92點；標指升63點；納指則反彈逾3%，升436點。
美國總統拜登宣布，美俄關係正式決裂，同時已無意與俄羅斯總統普京對話。美國同時宣布制裁俄羅斯銀行業將近80%資產，包括俄羅斯VTB銀行、SberBank、俄羅斯商業銀行Otkritie、Novikom銀行等。不過拜登講還講，同呢一刻都仲未剎停相關制裁目標使用SWIFT，家陣畀人係咁話佢廢。美國對俄羅斯嘅制裁，似乎未能阻嚇俄羅斯攻打烏克蘭，嚟緊嘅焦點係，美國跟歐洲其他國家，會否介入烏克蘭戰事，若然大家都只係得把口，最終市場總會消化有關俄烏嘅戰爭狀況，股市亦會由波動轉趨平淡。
除咗俄烏戰事令市場之外，高盛警告，美國正面臨近一個世紀以來最嚴重嘅「缺工」潮，勞動力缺口恐達460萬人，僱主加薪留人會引致「通脹螺旋」困局。有分析預警美國未來3至6個月通脹將飆至一成，「與通脹共存」嘅惡果係經濟萎縮及股市不振。
其實美股雖然自1月開始下調，但唔少股份仍然估值未夠平，喺通脹加息威脅下，美股未來一段時間都唔會回復去年只要肯坐就贏嘅局面，市況會更趨波動，尤其三大指數已先後跌穿250日線，若然短期都上唔返去，美股入熊成事實，就算過後享受過美股再美好嘅時光，都係時候面對現實。今年美股唔可以坐定定，只可以多做短線操作，同埋跟港股一樣，只能輕倉上陣，唔係博殺嘅時候。
至於港股當然係隨波逐流，即使估值已跌至蔗渣價，喺外圍地緣政治因素，以及內部缺水唔夠成交支持下，港股暫難有發圍，即使今浪當噚日搵咗個底，可能維持上落區間格局，暫時大型上落區間喺22600至25000，只有喺呢個範圍繼續短線操作。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。