9月22日，美國最新失業救濟人數回落，加上環球債息回升，加息預期再度升溫，VIX升破17水平，美股三大指數顯著下跌，道指跌370點；標指跟納指分別跌72點及245點。科技股沽壓沉重，ARM上市先升後跌，更跌破招股價，AI熱潮似乎已告一段落，今年股王Navidia都頂唔順，回落至410美元水平，留意跌穿400美元，跌幅或進一步擴大。
美元保持強勁，人仔自然易跌難升，目前於7.3水平左右徘徊，中概股向下，隔晚港股喺夜期跌穿17600水平，噚日A股亦全線下跌，成交只有5790億元，明顯係外資走咗唔返轉頭，港股情況一樣差，噚日再跌230點，成交774億元，莫過話成交難以重返千億元之數，依愈玩愈縮，就連每日成交額要超過800億都吃力。
中港股市表現咁差，外資一去不返，主要係外資認為政策風險難以計算，加上公司管理風險溢價亦太高，內地企業唔會先考慮股東利益，更甚係利用自己職權炒股賺取過人利益，港股情況亦相近，大股東利用財技搵小股東笨，外資自然唔會再落搭，就連散戶亦死心，資金離場，成交萎縮，令到中港股市進入長期有波幅，冇波幅嘅情況。
啱啱就出現咗一個好明顯大股東搵小股東笨嘅情況，魯大師(03601)由於持有超過5億元現金，上週公司出通告表示，有意本週開董事局商議派發特別股息一事，消息一出，股價兩日間由1.1元彈上1.94元，聽落公司有錢派息好合理，股價炒上亦係自然不過嘅事。但喺會議舉行前，公司主席田野，突然喺高位大手沽售3434萬股，令其持股量由30.76%急降至17.99%，引發股價大跌，更跌破炒上前低位。最離譜嘅係，公司噚晚再發通告，表示更取消會議，即係唔再就派發特別股息進行商議。公司擺明係借出消息炒高股圖利，小股民見之前嘅利好消息追貨，全部做晒韭菜。呢啲例子多不勝數，一個咁嘅市場，叫資金仲點會放心入場。
本周一連4個交易日沽空佔比超過20%，恒指今早若低開下試17500關，但近日港股成交低迷，跌至呢啲前底，唔排除又彈返三兩百點去逼空軍減倉，即使反彈17700至800為大阻力位，彈到呢啲位，未能重返之上而企穩，睇怕下星期返嚟，繼續陰乾再探底。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。