8月23日，短暫時間月陽光，間中有幾陣驟雨，局部地區有雷暴。隔晚美股個別發展，美國10年期債息由16年高位回落，銀行股受壓，拖累道指跟標指分別跌174點及12點，納指則升8點。雖然美國通脹有回穩跡象，但媒引述一項最新調查發現，多數打工仔轉工薪金卻創歷史新高，接近年薪8萬美元之多(約62.4萬港元)；由於薪金為推動通脹嘅主要因素之一，意味住美國潛在通脹仍可能會一直處於高位。
目前美國通脹數據顯示通脹確有緩和，但遠未及聯儲局2%目標，鮑爺較早前亦繼續放鷹，薪金高企可能令聯儲局繼續維持高利率政策。聯儲局今年之內應該唔會減息，令市場開始擔心美股喺高位未能再靠減息期望而突破向上，反而會迎來一個較大幅度調整。近日「大賣空」主角原型Michael Burry近期又有驚人舉動，根據美國證券管理委員會(SEC)公布嘅文件，Burry嘅投資公司「Scion資產管理」(Scion Asset Management)喺第二季買入價值8.66億美元嘅標普500指數ETF認沽權，以及7.39億美元那斯達克100指數ETF認沽權，明顯係睇淡後市。不過Burry係就係貼中2008年海嘯，但其後已有七次睇錯市紀錄，對於美股後市何去何從，市場意見都幾兩極。
至於港股就不提也罷，雖然呢兩日喺17600水平似有支持唔多肯再落，但反彈力度認真麻麻，噚日大市反彈167點，係近日唯一一次收市價高過上一個交易日，可惜成交繼續低迷，缺乏成交配合，即係大市由20000水平回落逾二千點至18000水平樓下，仍未有資金肯趁低吸納，弱勢反彈只係呢個幾星期超賣得過份，不過弱勢反彈未能扭轉大方向，恒指若未能迅速回升至18000水平企穩，噚日回補17900即市下跌裂口後，再回落至17800水平，再度失守17800水平，大市亦只有再度考驗17500或下移至17300回補裂口。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。