港股反彈勢頭持續 暫亦難言回復強勢
9月8日，大致天晴，日間炎熱，酷熱警告生效，但局部地區有一兩陣驟雨。美股周一休市後，周二個別發展，喺十年債息升至1.383厘嘅情況下，道指下跌269點，標指則跌15點；不過納指再創歷史新高，升10點收市。喺美股高企之際，再有大行分析潑冷水，大摩周二下調美國經濟增長預期，將美國第三季度GDP增速預期值從6.5%下調至2.9%。大摩指美國8月非農就業數據實在太跩，新增就業崗位僅23.5萬個，創下今年1月以來最差表現，遠遠低於經濟學家預測嘅72萬，亦未有達到美國總統拜登聲稱，每月可以新增60萬個嘅目標。
大摩除咗調低經濟預測，亦同時調低美股至減持評級，並預計隨着聯儲局準備收緊寬鬆貨幣政策，美股喺9至10月份將經歷一段坎坷之路。大摩將標指嘅年終目標點維持喺4000點，較隔晚收市價4520點低咗超過一成。而高盛亦發表報告將美國土GDP增長預測下調至5.7%，並指消費者可能減少支出。唔少金融及評級機構陸續將美國土GDP預測調低，主要係反映疫情反彈下，美國經濟增長放緩，而上周嘅就業數據亦反映，經濟復甦不似預期。不過喺美股仍然強勢之際，當然要順勢而行，古天后就唔會去估頂，暫時亦睇唔到有乜嘢因素令美股會出現急跌或大幅度調整，只係美股估值唔係平，目前減低倉位，鎖定部份利潤就梗係無錯。至於會唔會出現股災，現階段真係唔需要諗太多，睇住個債息做人，債息目前仍然喺1.5厘樓下，若然升穿1.5厘，就要提高警覺。
至於港股反彈持續，喺ATMX做返好啲帶動下，恒指重上26000水平，不過50日線(26569)阻力唔少，要一躍而過非容易，暫時10日線(25919)跟20日線(25829)交匯處係短線支持，守得穩，反彈勢頭持續。只不過港股暫時仍處於上落市格局，50日線就算過得到27000跟100日線(27660)及250日線(27313)阻力更大，一日唔收復呢兩條線，港股都唔算係回復強勢。咁嘅市況下，只能繼續追隨資金喺不同板塊之間輪動，摸石過河，邊炒邊走，唔好太過進取。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。