6月16日，多雲，間中有驟雨，雨勢有時頗大及有狂風雷暴，天氣較唔穩定。美國維持息率不變，雖然點陣圖顯示今年內或再加息兩次，每次0.25%，預期今年聯邦利率將見5.6%，較原先預期5.1%高，而鮑佬繼續放鷹，指今年內都唔會減息，雖然呢個較鷹言論，一度令前晚美股打咗個冷震，但喺FAAMG等圱磅科技股發力下，納指跟標指回完再破頂，並升至高位收市，隔晚美股升勢持續，三大指數再升逾1%。目前美股投資氣氛高漲，資金持續流入，完全漠視所謂嘅壞消息，標指已升穿4400水平，暫時4300已成為支持，留意標指失守4300就有機會轉勢，但有智慧不如跟勢，暫時未係做淡嘅時候。
美國暫時唔加息，但澳洲及加拿大加息0.25%後，歐央行一如預期加息0.25%，並揚言7月仍有加息可能，市場已接受加息，主要係核心通脹仍然高企，6月過後CPI喺高基數效應消失下，難以再大幅回落，今年之內唔減息亦合情合理，市場似乎已接受現實。美股近日能夠節節上升，好大原因係歐洲股市喺較早前創新高後，資金流入美股及日股追落後，造就美日兩地股市強勢。而美匯指數從100回升至105水平，不利新興市場，人民幣上月起不斷低走，令上月中港兩地股市下跌。
不過追落後嘅概念，喺6月份於港股發揮作用，港股由18000水平返彈至接近20000水平，主要係美國國務卿將會訪華，而阿爺亦出手減息，更有消息指內地將再推出刺激經濟政策，阿爺喺本周末再出招。喺一連串好消息同時，港股已升抵19800水平，成交額亦增至1214億元，不過北水卻於噚日錄得淨流出資金74億元。北水心急出貨，未有等待周末好消息，急急腳沽貨套現。留意ATMJB等重磅科網股，已逼近阻力位，喺資金面唔算強嘅情況下，要突破阻力有啲難度。既然北水都開始沽貨撤退，若然今日再見北水淨流出，更能證明北水買入只係短線操作，散戶已被多次割韭菜，本論升浪已唔再相信港股，港股即使已由上月低位反彈逾一成，都只係大戶對決，好友挾淡，但挾大可以去到幾盡，古天后都係睇成交做人，一個缺乏成交支持嘅反彈浪，由萬八彈到二萬，已可能係強弩之末。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。