8月25日，天氣炎熱，部份時間有陽光，亦有幾陣驟雨，日間局部地區有雷暴。Nvidia業績公布後盤前表現勇猛，但高開低走，最後只係持平收市，出埋枝陰燭走勢麻麻，拖累其他科技股腳軟，加上本來呢啲股份估值已經唔平，回調亦係理所當然。三大指數下跌逾1%，道指跌373點；標指跌59點，又再重返4400水平之下，短線或再考驗4300至4350支持，納指則跌257點，VIX再度升穿17恐慌警戒之上。
美股踏入8月份，資金開始由重磅股流向熱炒二三線股份，甚至連垃圾股都炒埋一份，迷因股又再吹雞玩挾空軍，WeWork喺8月初透露公司可能無法持續經營，消息一出股價當然插水，但即晚已見股價反彈，翌日股價更瘋狂返彈150%，主要係市場炒開迷因股嘅一股散戶力量，吹雞大挾控倉，等同莊家活動，炒得垃圾，美股升勢亦去到尾聲。
般當美股炒到迷因股又落鑊，雞犬皆炒嘅時候，重磅股就會出現回吐，至於美股會唔會出現大幅度調整，甚至崩盤，暫時就唔多見有咁嘅跡象，估計去到10月前仍處於高位回吐或橫行嘅狀態。美股業績期已屆尾聲，當Nvidia業績都唔見有料到，連AI火車頭都到咗終點站，美股再無支撐大市向上嘅力量。
至於港股由20300回落至17500水平，回吐幅度超過一成，不過跌穿18000點後，反見成交重返1000億以上，似乎係低位開始有少量買盤流入，加上空軍飽餐一頓後有所收歛，港股呢幾日先叫喺跌浪中有些少反彈，叫做可以抖抖氣。至於業績期又差不多近尾聲，美團(03690)公布業績一如預期咁靚仔，核心業務收入增長39%，其中最標青係旅遊增速超過100%，原因係去年同季低基數效應，加上今年內地力谷土本消費。不過外賣業務收入增長不及訂單數量增幅，反映競爭相當劇烈。由於高基數關係，管理層對未來預測偏向保守。美團股價喺ADR高開6.5%後出陰，收市時只升4.89%，折合138.7元，仲低過噚日收市價140元。美團噚日偷步炒業績，睇怕今日又係見光死。
港股雖然呢幾日出現技術反彈，但接近2800點跌幅，只係彈返700點左右，反彈力度之弱可見一班，加上成交仍然薄弱，唔見得真係有資金流入積極買貨，噚日恒指挑戰10日線，若然今日未能企穩，又重返18000水平甚至失守，反映呢幾日嘅反彈，只不過係跌浪中嘅技術反彈，暫未能確定跌浪結束見底回升，下周三期指結算，且看大戶下月有何部署。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。