6月14日，多雲，間中有驟雨及狂風雷暴，兩勢時頗大。美國隔晚公布5月CPI，跌至4%好過預期，美股再升，道指升145點；標指升30點；納指升111點。標指已升破4350首個阻力位，VIX持續下跌。反映市場情緒仍然相當樂觀，貪婪指數升至80極度貪婪水平，慎防AI股嘅擁擠交易熱潮一過，美股出現回調。今晚香港凌晨時間聯儲局議息，市場估計6月維持利率不變，今晚美股走勢要視乎鮑爺會後聲明，會唔會向未來息口走勢透過睇法，若然佢大老爺放鷹，堅持今年唔會減息，小心美股借勢回吐。
今次CPI一如預期回落至4%，估計6月前CPI喺高基數下仍會有較大幅回落，但7月至9月將步入放緩期，好大機會在靠近3%後開始橫行，由於核心CPI已橫行並回升，小心CPI喺8月至9月開始回升。不過過目前美股氣氛樂觀，受經濟數據影響較少。留意美國對新屋需求正在回升，房價開始反彈，估計未來通脹難以回落至聯儲局目標2%。
阿爺喺第一季度大大力放水，不過出嚟效果麻麻，呢一次嘅放水，只係將全年借貸放水目標集中喺第一季完成，喺第一季盡力量，其後三季就無計可施，並有機會陥入衰退。剛公佈5月份M2增速已從4月12.4%降至11.6%，社融則降至1.56萬億元，同比減少46%，但較4月多出3312億元，反映民間借貸活動唔算活躍，有錢都無人願意借。
今年部省市嘅城投已出現違約，中央講到明叫地坊政府唔好出面包底，令城投企業融資出現問題，城投唔買地，內房又無能為力，變相地坊政府嘅賣地收入大減，亦開始見到部份省市政府出現財困。呢個亦係阿爺努力放水，仍未見經濟活動有太大起色嘅原因。
A股嘅創業板喺快將穿底之際，市場就傳出阿爺再放水嘅消息，A股喺成交回升下見反彈，港股同樣反咗一段時間，但恒指已逼近250日線巨大阻力，即使有本事挑戰，但喺成交欠缺底氣下，未必能企穩，加上入場資金以短炒為主，無論萬八或萬九水平，仍未見有資金肯入場坐貨，內房物管板塊就係一個明顯例子，日升日跌，叫人無所適從。呢一種走勢，試問邊有人肯同你乖乖買貨坐定定，入場資金都係有食即食，走為上着。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。