港股向上推進需要成交配合
5月26日，部份時間有陽光，初時有幾陣驟雨，局部地區有雷曝，日間天氣酷熱。美股隔晚表現反覆，雖然市場對通脹升溫仍有疑慮，但聯儲局官員近期重申通脹壓力只係暫時性，舒緩市場對通脹及聯儲局收緊貨幣政策嘅擔憂，10年期美國長債孳息率降至1.55厘水平。不過大摩又嚟魔笛追魂，大摩CEO預計喺物價上漲下，聯儲局將會喺今年年底前開始縮減其買債規模，最快喺2022年初開始加息，遠比市場預期2023年開始加息為早。
至於港股噚日相當醒神，主要受A股走強帶動，恒指成功收復20及50日線，北水流入亦見增加，預期港股短線可繼續向上挑戰29000至29200水平。嚟到5月最後一個星期，港股有望重上二萬九大關，連續第二個月形成一個先低後高格局，所謂五窮月又唔係真係太窮，喺A股形勢大好下，古天后認為六絕月亦唔會絕得去邊。
今晚香港時間將會出現月全食，天文現象稱之為「血月」，古人一向視血月為不詳之兆，為大凶之象。唔少江湖術士將血月凶象連繫至大市走勢，加上喺五窮月內發生，較早前已有缸湖傳聞，「血月」之日定必係股市大跌之時，尤其美股處於高位，碰上呢個大凶之象，各地股市定必跌到死死下。古天后一向唔多相信呢啲講法，家陣處於資訊科技極速年代，以玄學去推算股市走勢，極度唔科學。古天后只相信數字，資金流向主導市場，股市升跌由市場決定，並非天文現象可左右。
睇返近日A股強勢，當然係受惠於人民幣走強，吸引外資大舉入市，噚日內地股市市值單日大漲1..83萬億人仔，滬深300指數全日飆升3.16%，創去年7月6日以來最大單日升幅，亦是自3月8日之後首次升穿100天移動平均線，數字可以反映市況。事實上，A股已經歷咗三個月調整期，調整明顯已屆尾聲，市場焦點將逐漸回歸經濟常態增長，部分股份估值已調整較多、行業長期向好嘅成長板塊有望重回市場主線。一如古天后早兩日所講，阿爺打壓虛擬貨幣買賣，令炒幣資金重返股市，而中國連日發炮指要遏制大宗商品價格「不合理上漲」，除咗有助緩解通脹升溫憂慮，亦有助將資金從商品市場重新引流至股市。
問題係呢兩日港股升勢仍未獲成交增加配合，當恒指已重返29000水平之際，成交仍然只有千五六億，港股要真正回復強勢，並繼續向上挑戰三萬大關，成交回勇係必要條件。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。