港股嚴重缺水 頸線死守但難有作為
7月21日，天晴，日間天氣酷熱。美股隔晚保持升勢，喺晶片法案獲初步通過下，納指跑贏升184點，道指跟納指則分別升47點及23點，標指跟納指已逼近阻力區，不過喺氣氛改善下，美股暫未見太大回吐壓力。標普指數已有一成企業公布業績，雖然大部份已公布嘅業績未算太標青，甚至更調低全年預測，但股價表現卻相當正面，主要係經過上半年調整後，唔少美股已重返較合理水平，只係唔少股份從低位反彈逾一成後，仲有冇資金願意追貨，又或資金繼續短炒操作高沽低買，令美股持續反幅，仍有待觀察。
值得留意係唔少大型企業均對經濟前景睇法較為保守，部份以裁員省減人手支出作為對應，最近消息係福特汽車計劃裁減8000名員工，Google亦表現減慢招聘。美國潛在嘅經濟衰退，政府所面對嘅問題係如果保就業及刺激消費，喺經濟前景唔明朗下，總統拜登支持度下跌至31%，已有近七成美國人反對其連任，第四季國會選舉，民主黨將面對選舉壓力，一旦失去民眾支持，民主黨未來兩年嘅管治道路將會崎嶇難行。
美元強勢令人民幣貶值壓力大增，港元喺套息活動下，頻頻見流出，近日金管股接港元沽盤可以話接到手軟，而銀行體系結餘已跌穿2000億。坊間再有言論指港元持續流走，將動搖到本港嘅聯匯制度，呢個推測古天后只係得啖笑，相關言論只係反映嗰啲人，本身唔明白港元系統如何運作，誇大其詞又指有大鱷沽空港元，港元跟美元脫鈎後或大幅貶值嘅推測，都係多餘嘅恐懼。莫講話銀行體系結算跌穿2000億元唔需要太在意，當然呢個係反映有資金流走，即使結算跌穿1000億元，亦對本港銀行體系毫無影響，唔明點解嘅，不妨去金管局網頁長知識，搵下資料了解一下，究竟港元系統如何運作，咪下下道聽途說，自己嚇自己。
隨住港元流走，港股成交亦縮減，不過暫時恒指似乎守咗日線圖頸線20700水平，只係未有資金流入，大市向上動力自然有限。但重磅科網股走勢已見改善，龍頭如美團(03690)跟京東(09618)表現明顯偏強，只要科網股嘅投資氣氛keep到，而最差嘅內房內銀板塊氣氛略有改善，港股要重上21000水平難度唔大，只係要進一步向上攀升，仍需要成交配合，而暫時港股缺水嚴重，指數亦只能維持反覆上落格局，暫難見突破。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。