港股回吐吼位吸納優質股
4月6日，天晴，日間炎熱乾燥，春天咁乾燥真係無乜幾可。俄烏局勢再度緊張，美股連續兩晚先升後回，隔晚道指跌280點；標指跌57點；納指跌328點，跌幅超過2%。除咗俄烏局勢左右美股之外，市場關注下月聯儲局將加速縮表，市場亦開始擔心美國或陷入滯漲。受到加快縮表及加息速度提速趨勢影響，美匯指數逼近100%，升至22個月高位，美元回流美國不利新興市場。大摩美股策略師Michael Wilson警告，美股「熊市反彈」已結束，在高價格破壞需求及產品庫存已趕上需求等因素下，美國經濟增長令人憂慮，投資者應從股市轉向防守性較高的債市。現時市況具有熊市反彈嘅所有特徵，納指喺過去3星期累漲逾13%，主要係股票超賣造成反彈，但短期將遇阻力，現時是係轉到防禦型配置嘅好時機。惟他不認為今年經濟會衰退，明年機會較高。有「鱷王」之稱嘅全球最大對沖基金橋水創辦人達利奧表示，經濟可能陷入一段滯脹期，美國聯儲局為咗充分對抗通脹，需大幅收緊政策，能否成功令經濟「軟着陸」係聯儲局一大難題。至於港股喺周一假前升抵22500-22600水平，中概股喺周一晚回升，令夜期最高升至22670，不過隔晚中概股跟隨美股回吐，ADR跟黑期亦見回落，估計今日港股將回吐至22200水平爭持。北水今日回歸，係入市掃貨抑或追沽，要開咗市先知佢哋點做，北水動作一向估佢唔到，低沽高追呢啲不智行為常有發生，望就望今日北水唔好加多一腳踩埋一份，否則港股可能下試22000搵支持。內地3月官方製造業及服務業採購經理指數(PMI)跌至收縮區間，市場憧憬第二季內地將放水。然而，美國滯脹風險、內地科網監管等因素持續限制港股上行空間，加上港元匯價偏弱，料恒指50天線(約22,800點)阻力增加。估計呢段時間港股先喺22000-22600水平上落。雖然港股較上月低位已反彈唔少，但以估值計算，22000嘅港股仍然值得吸納，估計喺5月美國議息之前，股市相對仍然安全，今日大市回吐，正好喺吸納嘅好機會，而古天后心水包括230元附近買入京東(09618)，160元附近買入美團(03690)，內房股心水仍然係碧桂園(02007)，可以喺6元至6.2元收集。古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。