港股回調博反彈
8月5日，多雲，有驟雨及狂風雷暴，雨勢有時頗大。美股隔晚靠穩，道指跟標指略為回吐，納持保持升幅。今晚將公布非農數字，市場等緊呢個就業數據公布。雖然聯儲局有鷹派委員指明年減息機會微，但債息並未見回升，仍然維持2.7%之下，市場樂觀情緒仍然高漲，資金傾向risk on，即使有個別美企公司未如理想，但股價未見下跌。唔少人已開始覺得美股已脫離熊市，牛市開始重臨，但事實上美國經濟仍有陷入衰退之嫌，加上通脹高企，目前市場樂觀得有啲唔尋常。
雖然近日美股一片欣欣向榮景象，但高盛策略師警告，隨住宏觀經濟數據繼續惡化以及盈利預測大幅下調，股市近期快速反彈勢頭唔會持續。喺未有明顯訊號顯示宏觀狀況轉向積極，短暫嘅風險偏好回升，可能令股市下跌風險加大，而目前熊市亦非結束。總之暫時對美股熊市結束，古天后有所保留，暫時都係小注宜情，有乜唔對路要識得落車走人。
軟銀以遠期合約融資套現，替代喺市場減持阿里(09988)，無疑係令到阿里短期沽壓減，阿里股價噚日反彈半成，雖然收市後交出一份好過預期嘅業績，但股價喺ADR高開低走，升幅由7%收窄至不足2%。集團收入首次零增長，過去兩年淘寶增長大幅放緩，市場份額正縮減，唯一仍有較大增長係雲業務，但都只錄得增長10%， Non-GAAP 淨利潤下跌30%，收入減少盈利減退預料之內。其實呢份業績唔講得上好，只係雲業務由虧轉盈，可惜呢部份業績佔比不足一成，唔算得上有乜嘢幫助。估計今日阿里股價表現唔會叻得去邊。
至於港股叫做上返20000點，暫時都係上上落落，始終喺缺乏資金流入下，港股難有突出表現。就連過往任性嘅北水，都唔再盲目高追，只會高沽低買，即係落到咁上下，接貨無問題，但高返少少都食糊走人，更何況高追真係唔使旨意。有限嘅資金喺唔同板塊之間游走，古天后都係吼位美團(03690)同京東(09618)，當大市插水跌幾百點，咪買些少博反彈，除咗咁樣，似乎都無乜好做，難怪愈嚟愈多缸邊友已放棄港股，轉戰美股。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。