港股回調屬正常 回補裂口有助走得更遠
2月1日，多雲，日間部份時間有陽光，氣溫回升至20度以上，但本周稍後時間風勢將又轉大，周末有幾陣雨，天氣又較冷。美國聯儲局議息前夕，市場憧憬今次加息幅度縮減至0.25厘，美股三大指數上升，道指重上34000關，升368點，報收34086，標指跟納指升逾1%，分別升58點及190點。留意標指正逼近4100阻力位，預期美股本周將較反覆，而標指面臨4100巨大阻力，要突破亦唔容易，除非本周公布業績嘅重磅科技龍頭，全部都有超預期理想表現。
內地人行進行逆回購1550億元人仔，變相向市場放水，但內地A股春節假後回來，未有太突出表現，首個交易日雖然紅盤高開，但最終升幅大大縮水，而噚日跟今日表現只屬平穩，原因都係入場資金未算積極。不過外資流入A股情況未改，雖然全球經濟環境仍存在不確定因素，但內地逆轉防疫政策，逐步復常後，內地經濟有望總體回升，國內外匯市場有基礎、有條件保持平穩運行，跨境資金流動將更加穩定。喺中國經濟增速企穩回升、人民幣資產吸引力增強，以及人民幣資產避險屬性凸顯等因素支撐下，外資將繼續穩步投資內地證券市場。呢個係有利日A股今年表現嘅重要因素。只不過古天后一直強調，內房嘅債務問題一日未能完滿解決，都係一個計時炸彈，呢條產業鏈過去一直支撐住內地整體經濟，呢個亦係內地股市估值目前正接近歷史估值低位，仍然未能節節向上嘅原因。內房板塊嘅發展，要待第一季業績公布後，先會有較清晰嘅畫面。
至於港股喺周一期指結算日回吐，兩日跌千點，但相對整個1月份急升3000點，而由10日低位計，累計升幅更逾8000點，目前出現回吐亦相當合理。目前恒指先失守10日線，下一步要考驗20日線，目前大約係21495亦正常。由於恒指喺過去三個月出現多個上升裂口，要回補下一個較近裂口為21400左右，再推前一個裂口為21000。若然睇好今年港股表現，要買貨暫時未係時候，待回補21000裂口先買一注，一旦恒指要完成頭肩底形態，要完成右肩的話，恒指回調至19500至20000亦非無可能，相對高位23000水平回落3000點，以10月低位反彈至23000高位計算，回調至19500至20000點，亦不過係回調呢一個升浪黃金比0.382。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。