港股大漲小回 大時代格局已成形
1月26日，天晴，早上清涼，但日間喺太陽高掛下，氣溫回升至24度，呢幾日保持溫暖。隔晚美股表現反覆，但科技股繼續做好，納指再創收市新高，升92點收市；道指雖然全日走軟，最多曾跌逾400點，但尾市跌幅大大收窄，僅跌36點；標指亦扭轉跌勢，倒升13點。至於港股噚日升逾700點，升至30100點水平，但美股隔晚早段偏軟，拖累港股ADR跟夜期下跌，恒指喺新加坡黑期喺30000水平附近爭持。
持續流入嘅北水，支撐港股一升再升，恒指短短一個月升3000點，其實都唔係第一次，但喺疫情肆虐，實體經濟仍未復甦嘅倩況下咁樣升法，又難怪唔少長期淡友日復日大叫股災將至，要有泡沫隨時爆破嘅準備。由全球央行大力放水，量寬再量寬所引致嘅資產泡沫確已形成，但泡沫幾時爆破，古天后無水晶球，無法預告，講開都話「有智慧不如趁勢」，天要下雨，娘要嫁人，跟資金湧入，股市要升一樣，逆市做淡呢啲螳臂擋車行為實屬不智。
至於炒股炒到天昏地暗嘅缸邊友，硬係見到三萬呢個心理關口要開淡倉或買入逆向指數ETF，美其名係做對沖，老老實實又唔係基金經理，手上炒作股份並非一定同恒指掛鈎，做淡指數只不過係想汁到撈埋，捕捉短線指數回吐嘅藉口，若然真係睇淡後市，根本要清倉離場，一邊買股票，一邊做淡指數，完全係精神分裂嘅行為。港股今年大時代格局已形成，當大市累積一定升幅後，短線回吐無可厚非，但以為港股嚟到三萬行人止步，只係唔了解國情，唔明白北水湧入港股背後嘅使命。
北水主導港股已成事實，但唔等於外資喺港股無咗話事權後拒絕再玩，世界任何一個角落嘅資金，都係瞄準有回報有錢搵嘅市場尋找機會，喺美元持續疲弱，人民幣匯率穩定偏強下，中國資產更能突顯其投資價值。而港股超過七成市值來自中資企業，亦係中國資產嘅最大境外定價中心，外資又豈會錯過投資內地資產嘅機會，口裡說不，身體最誠實。事實上，喺疫情肆虐全球下，中國係少數去年仍能錄得經濟增長嘅主要經濟體，要旗下管理資產表現好好睇睇，投資中國資產已成必要。港股喺北水跟外資雙雙捧場下，今年定必係精彩嘅一年，眼見港股一個月升咗三千點就唱淡話見頂，肯定只會錯過呢一次大時代。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。