港股如無底深潭資金避入場
10月11日，天晴，天氣非常乾燥，早晚天氣較涼。美股隔晚高開低走，尾市跌幅收窄。道指跟標指分別跌93點及27點；納指跌110點，盤中曾跌穿上周低位，主要係晶片股走弱拖低，幸而重磅龍頭股靠穩，納指才不至於低位收市。嚟緊周三及周五美國將公布通脹數據，美股是福是禍，反彈定係繼續插水嘅指標。
嚟緊有銀行股為第三季業績期揭開序幕，唔少大行已表示喺庫存上升及勞工成本高企下，企業盈利難免被蠶食，一旦收入下跌盈利亦難保。與此同時，標指淡倉正持續增加，當淡倉側埋一邊，唔排除美股反彈挾淡友。過往幾季美企公布業績之際，同時宣布回購公司股份，往往帶動股價做好，至今美企回購金額已高達4000億美元，呢個亦係美股喺上兩季當全球股市向下時，仍能企於高位。不過嚟到第三季，回購再唔係美股靈丹妙藥，美股三個主要指數，喺企業回購下仍然跌跌不休，當然強美元不利股市，另一個原因係明年1月開始，通貨膨脹削減法案將正式落地，屆時美股想回購便需繳交1%的消費稅。目前現金較為充裕嘅公司就博命回購，否則明年就要交稅。既然明知明年企業回購意欲或減低，自然令唔少投資者趁公司回購先沽出股份，呢個亦係美股喺第三季表現開始走弱嘅原因。
港股噚日喺北水回歸下回軟，上周假期後恒指一度報復式反彈千點，重上18000水平，可惜短短三個交易日又打回原形，噚日北水回歸幫手沽埋一份，恒指回落至17200水平嘅同時，成交額增至951億元，說明北水返嚟係沽貨唔係買貨，睇嚟港股只有再度向下底。暫時未見有邊個板塊可以敵得過跌市衝擊，連藥明生物(02269)子公司被剔除美國黑名單，升勢都只係曇花一現後倒跌，反映市場都係趁好消息出貨，任何因為好消息而追入股份，最終只有資金被套死嘅下場，咁嘅情況下，試明仲有邊個願意將資金投入港股呢個無底深潭。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。