港股悶局持續 仍未宜重鎚出擊
4月23日天晴，日間炎熱，最高氣溫31度，不過夜晚溫差較大，高低溫度相差七八度。本來美股彈得好地地，隔晚中段仍錄升幅，但有消息指拜登有意調高個人所得稅，向高收入人士開刀，拖累三大指數跌近1%。外媒引述消息指，拜登計劃向年收入超過100萬美元的美國人提高資本所得稅，由目前的嘅20%上調至39.6%，並對呢班人嘅投資收入加徵3.8%附加稅。報道指，有關計劃將於「美國家庭計劃」中宣布實施。
美國為咗刺激經濟，大灑金錢令債台高築，雖然啱啱財政部拍賣20年期國債反應理想，但拜登政府仍要繼續開源，之前已經講咗要調高公司利得稅，依家再向高收入人士開刀，難免嚇怕市場。
至於港股呢邊無乜方向，恒指暫時仍然喺28000至29000之間上落，全球疫情因為變種病毒再升溫，或影響經濟復甦進度。而經濟復甦進度遲緩，寛鬆貨幣政策侷住行落去，股市喺資金充裕得過份，市場流動性良好，資金自然要搵資產投入，令股市仍然撐得住。雖然近日港股有多間公司進行大型配股集資，或股東減持套現活動，但市場似乎大一大都殺得起，好似騰訊(00700)跟美團(03690)完成批股後仍能穩守配股價之上，後者更配完不跌反升。
雖然有缸邊友認為大股東減持，公司配股向市場抽水，可能係睇唔好後市，趁依家先向市場抽定水，免得稍後市況轉差，配股抽水不成。其實市場資金充裕，上市公司配股集資為日後發展上定足夠彈藥，實在無可厚非，好似美團抽水後，股價表現唔係咁差，就反映市場認同美團發展方向，向市場抽水發展新業務，對公司係好事。而近日北水接連多日錄淨流入，其實港股又唔係太差，只係未有重大利好消息下，上落市格局仍維持。最近仍然以短線操作為主，未直重鎚出擊。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。