9月27日，大致天晴，但局部地區有驟雨，日間天氣酷熱。美國除咗聯儲局口吻近日鷹到爆之外，就連市場都開始相信美國息口仍未見頂，細摩CEO話美息要升至7%先到頂，嚇到隔晚美股啲銀行股散晒，三大指數隔晚顯著下跌，道指跌388點；標指跌63點，失守4300關重要支持，納指則跌207點。VIX升至接近19水平。之前都講過，美股估值唔平，當值博率變低，自然無資金願意高追。
美國新財政年度預期談判進展緩慢，市場又再擔美國政府停擺，近年兩黨就財案每次均見爭拗，就成為大市回吐藉口，最終兩黨都會喺限期前達成共識，因此政府停擺只係大戶短期震攝市場嘅藉口。反而真係影響美股走勢係經濟表現，下星期公布就業數據，一旦失業率回升，過份鷹派嘅言論隨時又被推翻。從實際情況嚟睇，通脹其實算係受控，若然係咁嘅情況下，聯儲局繼續放鷹，或拖累美國企業進行融資，當就業數據開始疲軟，聯儲局亦唔可以企得太硬。
不過暫時美息高企，令人民幣重返7.3水平，表現持續疲弱，雖然人仔疲弱係不利中港股市，但卻有助中國扭轉出口持續下跌嘅劣勢。阿爺亦唔太介意人仔保持喺呢啲水平，一來有助出口，二來內房債務危機下，人仔下跌有助減低國內資產下跌壓力。不過人仔咁弱，亦係會引發資金外流問題，阿爺就只有沽美債去換回美元。
至於中港股市都無乜好講，人仔疲弱令本來估值低廉嘅港股亦難以吸引資金入場，無新資金入場，港股缺水自然易跌難升。而唔少股份見大股東今年內持續減持，阿爺就已出手阻亦呢個情況持續。繼上週內地公布管控國內基金沽空策略後，噚晚又出招，明確規定主要股東減持主要條件，控制大股東掟貨，從而穩定市場信心。港股呢邊仍未見港府有任何動靜去刺激市場，乜嘢小組成立多時，連基本減印花稅以減低入場成本激活成交呢一步都未有意思去做。單睇今年全球股市集資額，目前港股已跌至第八位，阿里(09988)表示分拆菜鳥上市，市場亦唔見得有幾興奮，畢竟呢個消息都吹咗半年，乜嘢都消化得七七八八。而今年港股未見任何矚目嘅大型IPO，莫講話三甲地位不保，甚至跌出五大集資市場，過往嘅紐倫港，國際級金融中心光環漸退色，港府繼續無計可施，長此落去，香港只有淪為大灣區金融中心。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。