8月8日，部份時間有陽光，初時有幾陣驟雨，日間天氣酷熱。股神巴菲特旗艦巴郡續後股價創新高，帶動美股回升，道指升407點，標指升40點，納指則升85點。本來進入危險範圍嘅VIX升破17後再度回落至15.77，反映美股氣氛仍然強勁，稍有回落即見有資金入市低吸。
美國經濟較預期強勁，再有美聯儲局委員支持保持高息一段時間，但明年初有條件減息，不過美國政府財政惡化仍然令市場困擾，10年債息高企於4.08%。雖然美股表現強勁，但中概股就跟唔到美股步伐，高開低走，拖累隔晚ADR及夜期跌至19400水平，今日港股料再低開。上周阿爺再推政策救市，所謂組合拳刺激經濟，又係打嘴炮，並呼籲民眾要從股市中創造財富，買股可置富。呢次嘅所謂救政策，又係流於空談，恒指上周反彈至20381水平後，連日高開低走，並出現三連陰，加上成交未能配合，結果又重返二萬點之下，短短三日已回吐千點，反映資金未有跟隨阿爺嘅口號，入場買股博置富，北水就繼續彈出彈入。
說好的組合拳並未見有特別，反而阿爺向醫藥股開刀，表示要打貪反腐敗，噚日醫藥股被洗倉，但總成交額則跌至不足800億元，顯然資金未肯再大量配置港股。醫藥股嘅捧場客先死得無辜，上周初阿爺仲係口口聲聲話支持自家創新藥物發展，但轉個頭又話要反貪腐，結果醫藥股威咗兩日又被血洗。一而再，再而三地，北水借呢啲消息彈出彈入，人哋就早着先機短炒撈嘢，一般散戶信以為真，就後知後覺地瀨嘢，試問仲有幾多韭菜可被割，割到連根拔起，仲有邊個肯入場做點心?? 內地醫藥費高昂問題存在已久，阿爺要打貪無可厚非，但打貪前又放好消息，係要讓領導先走?? 試問咁嘅情況之下，仲邊有人肯信中港股市係一個理想嘅投資環境，捨難取易下，轉投美股甚至其他市場嘅投資者愈多，中港股市缺水更趨嚴重。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。