港股成交縮減 長假前整固
12月16日，密雲，間中有幾陣雨，天氣清涼，晚間氣溫進一步下降，周末氣溫清涼。喺CPI回落嘅同時，美國11月零售銷售下跌，令市場再度憂慮美國經濟或陷入衰退，美股隔晚顯著下跌，道指跟標指跌逾2%，納指更跌超過3%。值得留意係標指跟納指分別跌穿3900及11000點支持，若然未能呢兩日收復失地，小心美股再陷入跌勢。
隔晚美股大跌，11月零售環比倒退0.6%，遠低於市場預期的倒退0.1%，更創自去年12月以來最大環比跌幅，10月該數值係環比升1.3%，今個月嘅大幅下滑令市場失望，更重要係美股已較10月底位反彈咗17%。過往11月及12月係美國零售旺季，佔全年營收三成，11月份嘅零售數據下跌，反映感恩節銷售未如理想，12月聖誕節銷售旺季，似乎亦難寄予厚望。與此同時，零售重磅股Walmart股價，已較近期高位回落超過半成。
美股目前係牛熊十字路口徘徊，係好係醜決定於通脹表現，不過唔少大行相繼唱淡美股後市，大摩魔笛唱淡美股，指油價明年將重返110美元，引發通脹再度爆升，10月份更指標指要插水至3000點，結果美股10月從低位抽升，散戶聽呢啲大行支笛追沽，結果淡倉全軍覆沒，淡友被挾到頭崩額裂。
雖然美股隔晚插水，但中概股早段勁升，只係尾段難敵美股插水，金龍指數重返7000樓下收市。有消息指PCAOB已完成對中概股底稿審查，解取中概股被除牌危機，夜期及ADR隔晚跟隨金龍指數一度抽升至19800水平，只可借美股跌成咁，金龍都頂唔住，夜期跟ADR亦倒跌收市。
預期今日港股都唔會升得去邊，12月19500至20000目標已達，開始有調整亦合理，噚日大市成交已縮減至1056億，明顯入市資金已減少，睇嚟喺聖誕節長假期前，港股將繼續整固。目前恒指已跌穿10日線19441，短線19000心理關口將會係一個較大支持，而跌穿19000後，下一個支持位會係20日線18688，好友最後防線為100日線18259，只要條最後防線守得住，港股後市仍有條件挑戰250日線20507。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。