港股成交萎縮 資金目前入場意欲低迷
2月15日，天晴乾燥，早上寒冷，天氣清涼。隔晚美股表現反覆，公布1月CPI略高於預期，市場第一個反應係短期息口高企，年內減息希望幻滅，一度拖累三大指數跌逾1%，但其後市場憧憬下半年經濟反彈，資金再度入場，加上索羅斯大舉買入Tesla股份，帶動高增長股做好，妠指倒升68點收市，標指僅跌1點；而道指跌幅收從400點收窄至156點。
雖然金CPI喺去年10月左右見頂，但回落速度唔見得特別快，尤其租金及二手車價格對CPI變動影響有所滯後，當美股已從去年10月低位反彈逾兩成後，市場要求更快嘅CPI回落速度以支持美股繼續向上，但結果不似預期，美股自然無法於現水平出現更大升幅，目前核心CPI仍高達5.6%，主要係油價及資源價格從低位反彈，預期核心CPI要待第三季先會見到較大跌幅。本來市場一廂情願地認為聯儲局可於5月停止加息，但隔晚CPI數字一出，市場對5月議息會議加息0.25%嘅預測期望，從不足五成升至超過七成。預估今年停止加息嘅期望落空。經過呢一次嘅CPI數字，可以估計聯儲局宫員可大條道理繼續放鷹，而美股喺現水平仍有幾大承接能力，唯有邊走邊睇。
雖然美國今年經濟不至陷入衰退，亦有望成功軟著陸，但唔代表企業盈利會有好好表現，所謂美國經濟未至太差，只係就業市場可保持穩定，唔會有大量企業陷入破產困局，而並非經濟可以一飛沖天。當美股已反彈至阻力位，值博率已大大降低，加上市場過份樂觀，美股停滯下前，即使唔見大幅下調，亦難以喺現水平再作突破，形成近日反覆局面。
至於港股呢邊調整似未完成，尤其係近人人民幣匯價表現反覆偏軟，港元見有流出，金管局已兩度接港元沽盤。雖然目前銀行體系仍有770億元結餘，資金尚算充裕，但亦反映暫時係未見有資金流入，而近日大市成交持續萎縮，噚日成交額跌至不足1000億元，可見現水平嘅港股，亦未能吸引資金入場低吸。大市回補20800首個上升裂口後，反彈至21300點又告掉頭，睇嚟港股下試下一個上升裂口20200嘅機率已大增，有意買入港股作中線投資，都係忍多一陣，等回補20200裂口再入場勝算較高。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。