港股整固需時 暫仍未宜進取
5月11日，多雲，有驟雨及狂風雷暴，初時雨勢有時頗大。美股隔晚個別發展，美股經過幾日狠狠地插水向下，早段見三大指數反彈，可惜道指早段曾升逾500點後掉頭向下，全日仍要跌84點；至於標指跟納指則分別反彈9點及114點。雖然鮑爺喺議息會議表示排除嚟緊加息0.75厘，不過局內其他官員則表示，唔會永遠排除加息0.75厘嘅選項，如果下半年通脹情況無改善，當局都係要加快行動。有官員警告美國經濟可能再次出現季度負增長，失業率恐會提高，估計通脹不會在2022年底或2023年回落到2%。
睇返美股嘅反彈力度唔算強勁，最先破底嘅納指反彈叫有多少少力水，但道指跟標指反彈力度就比較弱，反映美股喺反彈期間嘅承接力只係一般。留意今晚將公布4月份CPI，喺油價高企下，呢個數據唔會好睇得去邊，一旦數據表覝麻麻，今晚美股甚難延續反彈。
至於中港股市，上證指數似乎要力守3000點，噚日港股亦係靠A股向上而低開高走，只係深滬兩地股市成交一直徘徊萬億之下，反映入市資金有限，A股能靠穩都只係沽盤暫時撤退，話晒阿爺開到口叫基金投資眼光要長遠啲，唔好咁短視，變相叫基金咪亂咁沽貨，A股沽壓自然有所退減。但唔沽貨亦唔等於會買貨，始終內地缺水問題嚴重，股市缺乏資金入場係大忌，暫時A股只能轉為防守。
至於港股噚日低開，現貨見過19178低位後反彈，可惜全日成交額亦只有1436億元，同樣係面對缺水問題。雖然噚日重牛區已被屠殺，大家都期待大市有個似樣啲嘅反彈，可惜缺乏成交下，港股就算唔再大幅向下，目前亦只能喺19500水平徘徊，一如噚日所講，港股需時整固，個別估值合理嘅重磅股可分段收集，但未宜進取，只能小試牛刀，繼續低買高沽多做短線操作，先有機會捱過呢次股市寒冬。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。