10月5日，大致天晴，日間天氣酷熱，但局部地區有驟雨。美國私營企業職位增長數字遠遜預期，美債息從高位回順，美股周三好淡爭持，表現反覆，但最終三大指數倒升收市，道指升127點；標指反彈34點，仍未修復4300重要支持；納指反彈176點。VIX有所回落，但仍然喺17以上，美國仍有一定回吐壓力。
小非農數字公布後，年底前再加息機率又回落至只有31%，星期五晚公布大非農數字及失業率更為關鍵，若失業率進一步上升，美聯儲無乜藉口加息。ISM服務業指數回落1%至53.6，訂單指數經過6個月回升後開始回落，企業開始放緩擴張。美股喺6月及7月大挾淡倉，但8月及9月到淡友發圍，做淡嘅對沖基金大舉出擊，單係9月標指累計跌近5%，道指則蒸發今年全部升幅，據S3 Partners資料顯示，沽空投資者單計9月賬面勁賺500億美元(3900億港元)，創今年最佳表現。值得留意美國企業債於第4季陸續開始步入再融資期，明年第2季會進入高峰，一旦10年息長期企於目前高水平，美國企業再發新債續舊債嘅融資成本大增，當然唔係好事，唔排除又出現另一輪違約潮，成為空軍淡友做淡美股嘅最佳藉口，若然聯儲局仲唔醒水，不斷放鷹，淡友正中下懷。
不過美股暫時估值過高係一個問題，前「債券大王」格羅斯(Bill Gross)於投資展望中認為，債息需大幅向下，股市先會重現吸引力，儘管目前債券投資亦唔係特別吸引，但喺經濟放緩或衰退下，相信表現會較為理想。
至於港股維持疲弱，假後復市兩個交易日跌逾600點，但技術指標顯示尚未到超賣水平，14日RSI昨收報37.4，未達30超賣區，而一般港股出現超賣後，日線RSI或要下調至20樓下先會出現較大幅度反彈，目前恒指仲有向下空間，短線維持尋底格局。即使短期反彈，喺缺乏成交配合下，暫時亦難重拾升勢，除非突然有重大利好政策出台利好消息帶動，可能最快要等到施政報告先會有機會。不過一日外資唔回頭，好消息刺激短暫反彈後，又係打回原形，維持有波幅，冇升幅格局。經過兩日下跌，今日可能牛皮，指數或於窄幅上落，但十個牛皮九個淡，港股目前仍難扭轉浪低於浪，持續向下尋底格局。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。