港股暫乏利好因素推動
5月7日，天晴，日間炎熱，氣溫超過30度，好彩仲有微風。隔晚美股個別發展，雖然三大指數收市報升，但科技股及高增長股仍有沽壓，納指盤中曾跌逾百點，收市則倒升50點；道指再創收市新高，報收34548點，升318點；標指則升34點，報收4201點。美國經濟加快復甦，推動股市上漲嘅因素似乎消耗得七七八八，聯儲局亦提醒資產形成泡沫風險增加，高增長股難免被拋售。
人家美股道指屢創新高，港股呢邊見起色，雖然噚日北水回歸，成交回升，但指數都係上上落落，未見突破，亦無方向。北水雖見有入場炒作，但都係炒上落，噚日錄得淨流出，成交多咗唔係買貨係沽貨，港股又點會有起色。內地反壟斷法針對重磅科技股，陰霾未除下相關股份有波幅，冇升幅，港股當然缺上升動力。
國際地綠政治局勢不明朗，中美兩國關係自拜登入主白宮後，未見改善，拜登政府更積極拉攏盟友，聯手抗衡中國，香港呢個中美之間嘅磨心，又點會有運行。而印度疫情嚴峻，打擊投資者對新興市場信心，外面資金唔流入新興市場包括港股，北水又唔積極掃貨，港股自然難有突出表現。
內地方面亦唔見有重大利好消息，A股表現疲弱，而港股七成市值來自內地企業，中資企業近日未見估值拉升，加上去年中國率先控制疫情，唔少經濟數據比較基數開始回復正常，再無低基數比較，今年經濟數據表現相對去年溫和，市場氣氛亦難有刺激。
A股港股本身已缺乏支持上升因素，成交亦欠活力，至怕係美股攀升至現水平，連聯儲局都開到口話資產泡沫形成風險增加，一旦出現估值重評，美股出現較大幅度調整，定必拖累本來已乏力向上嘅港股借勢踩多兩腳，港股再下試3月低位27500水平亦有可能。缸邊友繼續保守，輕倉對應目前市況，短打游擊為上策，坐定定等派福利日子已不復再。
P.S. 下周一筆者休假，本專欄暫停一日，周二回復正常。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。