港股暫無方向 暫於千點內反覆上落
9月1日，短暫時間有陽光，有幾陣驟雨，初時局部地區有雷暴。美股隔晚要回一回氣，標指跟納指上咗歷史位後稍為回落，齊齊跌6點收市，道指則跌39點。總結美股8月份表現，道指累升逾1%；標指累升約3%；納指累升約4%。標指已經連升7個月，創自2017年12月(連升10個月)以來最長升勢。市場對美股睇法仍然分成兩派，不過保持樂觀嘅投資者，都開始表現即使美股仍有約一成上升空間，但奉勸投資者要保持理性。因為由幾乎泛濫嘅資金推動而上嘅美股，掩蓋咗短期嚴重風險，包括變種病毒擴散，高通脹，以及聯儲局仍未有清晰嘅加息路徑等等，都有機會令因為持續上升嘅美股，喺未來一兩個月將會有調整一成嘅機會，投資者長遠計都係要待大市調整買入。
至於港股噚日先跌後回升，成功收復10日線(25480)，主要靠重磅科技股帶動，市場似乎對內地監管由懼怕到麻木，甚至已接受，而內地科企亦表現合作，盡量配合監管當局要求。只係北水淨流出情況未有扭轉，噚日港股通錄得近37億元人民幣淨流出，北水繼續沽出騰訊(00700)及小米(01810)。
踏入9月，估計港股表垷仍反覆，暫時未見會出現單邊升或跌市況，恒指保歷加通道大約有超過2000點波幅，可惜未見單一方向指標出現。恒指噚日成功收復10日線，而跟20日線(25872)亦只有一步之距，但暫時未有足夠動力破20日線阻力，尤其恒指喺過去兩個月曾出現4次升抵20日線後回落，久攻不破嘅20日線成為阻力，港股可能需要更長時間整固，令保歷加通道收縮，恒指先會有機會真正突破。
除咗北水持續錄得淨流出之外，外資自7月底大舉撤離港股後，暫時亦未見回流，令港股缺乏資金下，難以向上突破。著名金融大鱷索羅斯喺外媒撰文，指內地對民企打壓，將嚴重拖累經濟，而最脆弱嘅產業係房地產，尤其住房。內地享有20年嘅地產榮景，如今已到結束，又指內地最大型房地產公司負債纍纍、瀕臨違約，恐導致破產。索羅斯認為，內地唔懂得市場如何運作，結果讓令中概股拋售過火，開始傷害全球嘅中國標的物。有鑑於此，內地金融當局早前出面安撫外國投資者，市場報以強勁反彈，但佢認為呢個係「騙局」。
索羅斯嘅睇法，古天后唔完全認同，行業規管係為咗未來發展，不過監管嚟得急且快，投資者一時三刻未能適應，而阿爺一連串監管行動，實為唔少估值之前離晒地嘅科企擠出水份，總好過市場瘋狂追捧，令資產泡沫無止境澎脹至一發不可收拾，到泡沫爆破可能要付出更大代價。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。