港股暫無方向提早收爐等過年
1月17日，天氣寒冷，大致多雲，日間部份時間有陽光，天氣乾燥。隔晚美股馬丁路德日假期休市，港股冇乜太大方向，隔晚夜期略為回軟，不過歐洲股市則上升。日本央行將於本周三進行貨幣政策議息會議，在此之前，日本公布嘅PPI增幅遠超預期，去年12月PPI暴漲至10.2%，反映上游生產成本壓力甚高，有機會令通脹失控，預計日本央行再難如過往持續極度寛鬆貨幣政策，或有機會收水，帶動日圓向上。日圓回升當然係唔少港人關人嘅議題，隨住各地復常，唔少港人喺通關後首選嘅旅遊地點正正係日本，日圓扭轉去年弱勢，日前已重返6算之上，睇嚟喺日本央行或進一步調整其「控制孳息率曲線(YCC)」政策，繼續收水，日圓只會易升難跌。
睇見日本嘅PPI咁勇猛，古天后喺度諗，係咪唔好對美國通脹見頂回落預期過份樂觀，睇返美國早前公布嘅12月核心通脹按月上升0.3%，符合市場預期。核心商品價格再次按月下跌0.3%，其中二手車價格下跌2.5%，跌幅高於市場預測。服裝價格按月上漲0.5%，家具價格上漲0.2%。住房價格按月上漲0.8%，係自1985年以來最強勁的升幅，租金繼續向上。醫療價格按月上升1.5%，而機票價格再次下跌3%。唔包括住所嘅核心服務價格按月上漲0.2%。
市場似乎低估咗通脹潛在反彈力，尤其係勞動市場仍然緊張，工資增長強勁及相關各種服務價格等，喺未來幾個月有機會保持強勁。而住房價格仍然係通脹推手，短期預測仍有上行風險，因為住房CPI開始回落可能需要較長時間。另一點要留意12月CPI值之中嘅醫療價格大幅上漲1.5%，係經過兩個月回軟後一次強勁反彈，唔排除強勁工資增長或支持醫療價格長期高企。下星期美國將公布PPI數據細算，美國12月核心PCE通脹有機會按月上升。
雖然FOMC有部份鴿派官員表示支持2月加息0.25%，不過一旦通脹死灰復燃，2月FOMC仍有機會繼續加息0.5%，就算下月一如市場預期加息0.25%，今次加息周期嘅最終利率仍然高見5.25至5.5%，明顯高於目前市場預期定價低於5%，對此投資者都係小心為上。
至於港股喺下周農曆年長假之前，並唔見得有太大方向，目前仍於21000水平之上高位震盪，雖然呢兩日挑戰22000水平不果，而成交預期縮水，呢啲情況都係少做少錯，提早收爐等過年。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。