港股未擺脫上落市格局
6月4日，多雲，有驟雨及狂風雷暴，雨勢有時頗大。憂慮美國跟中俄關係轉趨緊張，喺就業數據理想下，聯儲局可能部署收水，美股隔晚受壓，三大指數下跌，納指明顯跑輸，跌幅超過1%。「巴菲特指標」，即將股市總市值除去國內生產總值(GDP)已飆破200%，遠高於去年第二季的187%，表明美股已嚴重高估，響起警告。雖然美股已涉嫌估值過高，但散戶網民一於少理，繼續抱團個別股份，現時專攻網絡安全業務的BlackBerry成最新目標，被投資者認購完股份即日沽出套現嘅AMC，隔晚則急跌兩成。
至於港股噚日腳軟，恒指未能成功挑戰29500阻力，噚日再回吐，更失守29000大關及10日線。一如古天后所料，港股雖重上29000關，但未突破自3月下旬以嚟嘅阻力29500企穩，難言轉勢，仍然係區間上落，只係移動區間略為上移至28500至29500。
其實就算美國聯儲局未有「收水」迹象，以近日10年期美國國債孳息率再度有所回落，市場對通脹的憂慮得到紓緩，有利債市喺短期內反彈。隨住經濟逐步復甦，新經濟企業嘅盈利能力必然較傳統行業強，只係相關科網股受到內地監管機構嚴控，短期難有發圍，有心趁低收集，都要有耐性去坐貨，預咗係中刁線投資，否則都係咪多手。暫時都係炒股唔炒市，資金繼續不同板塊之間輪動，都係借消息及政策炒作，反正今日星期五，倒不如少做少錯，下星期再作定奪。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。