港股未能企穩二萬需時整固
1月29日，大致多雲，初時有一兩陣微雨，早晚相當清涼。美股隔晚成交淡靜，緊接聖誕又到新年，唔少基金經理仲放緊假，喺缺乏買盤支持下，美股三大指數下跌，道指跌365點；標指跟納指分別跌46點及139點。標指失守3900之前移動區間底部後，遲遲未能收復，走勢確係唔多掂，加上科技股偏弱，連龍頭蘋果公司都穿底，睇嚟納指好大機會再試10月份低位。
隨住今年美國多次加息，唔少美國企業已出現融資困難，而美國嘅不良貸款，而由年初時650億美元，大幅倍升至2750億美元，一年之內急增三倍有突，若然計及全球性債務，不良貸款更可能高達6500億美元。基本上全球銀行已於過去三季大幅增加撥備，已應付持續上升嘅壞帳。暫時個償債能力仍未見惡化，雖然裁員漸出現，尤其科技行業，大部份人都成功喺3個月內成功搵到新工作，即係美國就業市場未見有問題。
只不過歐美企業債務係一隻黑天鵝，尤其歐洲，過去十年企業已習慣借平錢，持續嘅QE令企業輕易得到成本低廉嘅融資，唔少歐洲企業基本上已失去賺錢能力，一直借貨渡日，如今息口向上，呢類企業處於生死邊沿，根本無法生存。若然企業無法成功再融資，就會出現違約。
較早前市場預期加息周期已到尾聲，甚至有更樂觀者，期待明年好快會減息，但呢種期望;隨住債息回升，尤其德國10年債息由3.55%短期之內急速上升至4.66%，幾乎要破頂，減息期望落空，近日股市再度走軟。全球息口何時見頂，都係要睇住通脹，只要通脹唔再惡化，明年各央行亦會停手加息，至於幾時減息，目前言之尚早，不過一旦企債持續惡化，央行亦會出手。
美股近日明顯轉弱，1月嘅表現似乎難以樂觀，港股喺噚日通關消息支持下，一度重上二萬水平，可惜二萬未有企穩，睇嚟二萬關都要爭持一段時間，甚至要繼續整固。目前恒指10日線已上移至19490，20日線則上移至19354，恒指短線支持大約係19300至19500，短線支持若失守，下一個較大支持位會係19000心理關口，此關若失，好友將退守100日線，講緊係18200水平，暫時都係睇住嚟做。個股方面，現水平買貨值博率有限，古天后會傾向等待，結算後1月基金進行配置，等佢哋出手再跟車亦未遲。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。