7月5日，部份時間有陽光，間中有一兩陣驟雨，天氣炎熱。隔晚美股休市，歐洲股市略為回調。歐洲喺未來幾個月，會再對微軟展開新一輪反壟斷調查，上次微軟成功和解已賠償了22億歐元，過去半年微軟股價因ChatGPT而大幅走高，但市場ChatGPT概念股熱度正在減退，小心熱度減退會引發板塊資金流出。而美股一直係靠幾隻重磅股支持住，一旦資金流出，或引發美股出現較大幅回調。
不過從資金面去睇，暫時都仲係risk on，唔覺唔覺BTC已重返3萬樓上，美匯指數喺100至105之間上落，人民幣跌穿7算後，雖然曾一度回升至7.23水平，可惜未能突破7.2水平，維持弱勢。目前內地經濟復甦緩慢，出口疲弱，喺咁嘅情況下，阿爺自然默許人仔貶值去帶動出口，但中美息差高達1%，喺持續貶值下，資金只會外流，人民幣即使有反彈，亦難重返7算。
雖然港股7月開局睇落唔錯，無奈升市幾日未見成交配合，講到底又係挾淡倉多過似真升市，噚日恒指雖然重上20日線，但全日成交額只有760億，買少見少。呢兩日急升嘅電動車股，全靠數據公布刺激，但呢個消息能否支持股價繼續高企，呢點古天后有所保留。至於噚日急升嘅醫藥股，基本上只係跌至52周低位後反彈，空倉回補令股價急升一轉，同樣係無資金跟進，頂多係資金入場短炒，日跌日升。
市場憧憬耶媽訪華會有好消息，但上次國務卿訪華，其後美國進一步收緊對華輸出AI晶片，即係表面關係破冰，但美國對華政策未見真正放鬆，估計今次耶媽到訪，都只係游說中國多買美債，講到底，中美關係都係睇利益。暫時港股短炒要手身敏捷，否則都係見財化水，長坐買貨，就要分段預咗要捱價，因為未見長線基金入場，唔夠子彈坐，又或無耐性者，呢啲時候入場，都口有被折磨。港股暫時都係上落市，有波幅，冇升幅，A股化明顯，只要望望A股嘅各大指數，大家對恒指未來表現都心中有數。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。