港股無資金願入場 大戶小戶只想度水走人
9月15日，天晴，天氣乾燥，日間天氣酷熱。隔晚公布PPI符合市場預期，經過周二急跌超賣後反彈，但高位卻遇阻，盤中一度轉升為跌，其後收市前再度回升，扭轉跌勢，三大指數回升，但升幅卻相當有限。嚟緊星期五係美股四重期結算，似乎好友想喺結算日前頂得就頂。
美國8月PPI按年升8.7%，已連續兩個月回落，算係符合預期，但核心PPI略仲算係高，雖然生產物價略為回落，但仍然喺高位徘徊，短期內通脹即使見頂，唔難以大幅回落。近日聯儲局態度強硬，喺年底前息口都係有加無減，主要係要穩住通脹唔再惡化，待通脹見頂後再度回落。
美國收水下，美匯轉強，美元資產相對吸引，相反其他市場，尤其新興市場則喺匯價偏軟下，股市亦乏人問津應聲而下。上半年海外資金淨買入美股高達5411億美元，同比增加76%，但美債下跌吸引加下降，只有634億美元海外資金流入美債，同比縮減57%。喺海外資金不斷流向美元之際，新興市場有機會出現「美元荒」。
周二晚美股急跌，港股例牌跟住插水，港股跟外圍跌唔跟升，早已為缸邊友所習慣，恒指裂口低開跌穿19000大關，並下試18800水平。不過近日港股都係玩裂口居多，無論裂口上定落，開市後即出現牛皮悶局，成交額不足千億元，維持係低水平，悶局始終未見突破。
市場缺水都已經一段時間，重磅股大股東排住隊沽貨，南非佬沽騰訊(00700)；日本仔沽阿里(09988)；股東巴菲特就沽比亞迪(01211)，騰訊就有意減持手上投資項目套現千億元，當中美團(03690)跟快手(01024)等就有被減持可能。中金(03908)忽然供股抽水，無貨好沽就向市場抽水，個個都係講緊要喺市場度水，一個二個淨係想套現走人，點會再有資金肯入場。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。