港股由盛轉衰 本世紀走上沒落之路
4月1日，局部地區有驟雨，部份時間有陽光，假期繼續炎熱，大家繼續享受陽光。拜登公布發展基建計劃前，隔晚美股個別發展，道指早兩日創新高後抖氣，跌85點；不過標指喺大型科技股領漲下創出收市新高；納指更升逾1%，錄得201點進帳。總括第一季道指、標指、納指分別累升7.76%、5.77%、3.06%，3大指數均連續4個季度錄得升幅。不過拜登宣布規模逾2萬億美元嘅基建計劃同時，亦宣布增加企業稅率至28%，暫時道指期貨表現平靜。
至於港股ADR及夜期有進帳，不過古天后對今日港股表現無乜期望，雖然今日係第二季開季，但明日開始復活節兼清明假期，港股將於下周三復市，通常長假期前都係買賣兩閒，預咗今日靜過鬼。至於港股第二季何去何從，古天后本來睇法較為樂觀，即使港股第一季表現由盛轉衰，憧憬次季北水或再有港股配置，本來預期復活節假期後港股有機會復活。
可惜噚日外電一個消息，對港股嚟講無疑係一盤冷水照頭淋，傳聞內地有意成立新交易所，跟港交所(00388)搶生意，港交所股價喺消息傳出後，收市前急急插水，由升轉跌，收市跌咗1.33%，報收457.4元。雖然港交所喺收市後發表諮詢文件，建議放寬來港第二上市的非WVR中概股至所有企業，不再限於「創新產業公司」。非WVR中概股上市時的最低市值要求將顯著降低之餘，港交所又建議給予雙重主要上市的發行人更大靈活性，計劃在港作雙重主要上市的「獲豁免的大中華發行人」及「非大中華發行人」，若滿足特定合規及市值條件，將可保留既有的WVR及可變利益實體(VIE)架構。
港交所嘅優化上市建議，咁啱得咁橋喺內地傳出增設多一個交易所吸引香港及美國等海外上市的中概股回流內地上市後公布，令古天后諗到今次內地增設交易所同港交所搶生意，似乎有別於過往叫口號式嘅紙上談兵計劃，若然成事，對港股影響深遠，短線則對港交所(00388)股價構成壓力。若然內地增加一個交易所「北水」毋須再經港股通投資，屆時港股交投量將大減。而估計新交易所將會以人民幣結算計價，對北水而言可免除買賣股票產生貨幣嘅匯兌風險，對企業而言，唔受港股市場嘅合規限制。不過喺人民幣仍未能全球自由流通，對上市企業而言，港股資金進出無限制，全球基金可自由買賣，集資上相對較有優勢，可以吸引全球投資者。
當然內地要成立另一個交易所都唔係三兩日可完成嘅事，只係長遠而言，香港國際金融中心地位將持續受到內地其他掘起城市所威脅，而本港官員喺水浸眼眉仍未知死，繼續自我催眠港股國際金融中心地位難以動搖，競爭優勢仍存在，更執意倒行逆施增加交易印花稅，凡此種種均將港股一步步推向沒落之路，港股由盛轉衰步伐或加快，難怪年輕一代已漸漸轉投美股懷抱，港股未來或淪落至新興市場內其一個交易中心，紐倫港三強鼎立將成為歷史。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。