港股穿底再穿底勿多手撈底
10月31日，部份時間有陽光，天晴乾燥，一號風球下，有時風勢頗大。美股上周五三大指數顯著上升，雖然亞馬遜業績麻麻，股價跌6%，不過蘋果公司績後股價升7%拉升美股，三大指數齊齊升逾2%，不過三大指數已屆反彈目標，唔排除開始部入整固期。美債息高企拖低科技股估值，增長股亦乏高增長動力，資金拋售當然唔會客氣，過去幾年高估值股份，一直靠燒銀紙渡日，當息率上升，高估值股夢醒，資金撤走亦係正常。市場無法靠低息借貸嚟燒銀紙，市場回歸理性，有能力賺錢還債嘅公司，先有生存條件。不過暫時美國流動性仍然充裕，仍有資金願意買入高息企債，原因係市場估計喺通脹受控下，息率有望見頂，息率難以長期高企。市場已消化美聯儲局本月加息0.75%，估計本周四FOMC議息聲明，可以確立一條較清晰嘅息率走勢路線。
美股雖有反彈，但中概股未見起色，A股上周表現遜色，10月外資錄得淨流出231億元，對上一次單月錄得A股淨流出係2020年3月爆發疫情股災。內地基金本身銷售亦低迷，基金經理出動到團購基金，亦未能吸引新資金入場，股市亦只有眼白白睇住日日插水。5月份內地地方政府提前發下半年債，並已於6月底前完成，A股就喺6月炒中，但隨住下半年各項工程上馬，呢啲錢自然要投入工程，A股亦打回原形。
至於港股都無乜好講，雖然北水一度流入ATMJ對抗淡友，只可惜上周五再次穿底，好友毫無還擊之力，10月基本上淡友贏到開巷。資金不足仍然係港股死穴，無資金流入，只要略見反彈，反而係促使資金逃生走人。港股一直向下尋底，繼續以一浪低於一浪嘅形態向住地獄進發，無人可以成功估底，只係目前半點見底跡象都冇，撈底博反彈大多空手而回，目前本地各大銀行都以高息搶存款，港元定期利率閒閒地都有4厘息，睇個款投資港股暫時都好難有幾厘回報，難怪個個呢期都走去存定期，免得手多去撈港股，撈底之後又穿底。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。