港股第三季仍有機會重返三萬
7月2日，部份時間有陽光，有一兩陣驟雨，天氣炎熱。美股隔晚做好，標指已連續六個交易日創新高，升22點；納指亦升18點；道指則進帳131點。市場仍等待美國公布就業數據，即使唔少指標已反映美股高處不勝寒，並已響起警告，大型調整隨時發生，不過市場情緒仍樂觀，唔少分析員繼續睇好下半年美股表現。
至於港股暫時仍未擺脫上落市格局，雖然近日新經濟股及高增長股表現已有改善，經過幾個月殺估值後，唔少新經濟股估值已重返合理、吸引水平，而影響相關股份嘅利淡因素，亦漸被市場消化。恒指要向突破，要靠ATMX等新經濟股發力。至於喺第二季受資金追捧嘅周期股及舊經濟股，料可繼續受惠經濟復甦，強勢料可持續，估計下半年資金將會左右逢迎，不斷喺新舊經濟股之間輪動，即係缸邊友嘅投資組合需要全方位配置，新舊經濟通殺。
近日美股持續向上並屢創新高，反映市場亦已完全消化美國聯儲局或提早加息嘅決定，重點係聯儲局不斷出口術，口吻由鴿轉鷹，擺明希望將收水預期影響減到最低，從縮減資產負債表到加息嘅過程將會較慢，預料寬鬆仍會持續一段時間，直到2023年先開始會加息。至於通脹問題，隨住更多人重返就業市場，應該可遏止工資增長，而供應鏈問題隨住經濟復甦可逐漸解決，通脹可能只係短暫問題。
港股好快又步入上半年業績發布期，唔少公司陸續發盈喜，尤其傳統股及周期股，好多開始預告上半年扭虧為盈，或有助帶動大市氣氛。而港股相對較美股落後，港股仍有機會喺第三季發力，並嘗試重返三萬大關，最怕係美股突然嚟個深度調整，而港股跟跌唔跟升，咁就真係痾粉，所以就算睇好下半年港股表現，目前都未係可以太過進取，控制注碼，量力以為，切忌瞓身。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。