9月12日，短暫時間有陽光，有幾陣驟雨，局部地區有時雨勢頗大。隔晚美股維持升勢，主要係Tesla被大摩調升評級，股價升一成，帶動市場氣氛。道指升87點，標指升29點，納指升156點。大摩調升Tesla評級主要係欣賞旗下超級計算機Dojo嘅AI運算能力強，呢一部份可以增加6000億美元估值，加上旗下FSD自動駕駛快將進入Level 3，呢個消息拉升股價升一成，剛好增加6000億市值。
另一方面，蘋果公司今晚將發布新iPhone及Apple watch，股價略有反彈但力度一般，過往蘋果股價通常喺發佈會前炒上，發布會後回落。按目前估值蘋果股價仍然偏貴，尤其係中國近日排外情緒升溫，再加上華為手機重生，可能會影響iPhone 15在華銷情，小心股價在公佈會後出現回吐。
美匯衝擊105關口失敗，美元轉弱，人民幣大幅反彈700點子，由7.365一口氣挾上7.292，除咗係美元回軟，似係阿爺出手干預。隔晚中概股借勢反彈，但資金高開後再高追意欲不大，夜期表現也是虎頭蛇尾。週一A股平開靠穩高收，成交由7000億回升至8411億，資金面有所增加但並不強。
至於港股噚日回落至17800水平見有買盤入場趁低吸納，總算成功修復萬八大關，成交增至1244億元，近期嚟講算有所增加，但買盤唔算積極。主要係外資未見影，喺外資未大舉重返港股市場下，港股都係keep住有波幅，冇升幅。
新地(00016)派完成績表後大插，業績結果不似預期，賣樓收益減少但都應該係預期之內，股價一直疲弱，理應有足夠調整反映呢份弱雞業績，結果都係畀淡友車低10%至77港元。目前港股最大問題係淡友話晒事，基金早放棄話語權，唔少股票被刻意沽空至唔合理低位，基本分析已失去作用，空軍淡友肆意做世界，人為控制多於一切，目前嘅股價未能反映公司實際價值。除非有心理準備入場買貨後持有一段長時間，可能要以年計算，若然好在意短期上落，暫時都係遠離港股，珍惜健康，否則望住股價唔合理地維持喺低位，真係會令人鬱結，影響健康。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。