港股縱反彈仍未擺脫反覆上落格局
10月8日，多雲，有狂風雷暴，三號風球正懸掛，但八號應該打唔成。美國國會有望喺短期提高國債務上限達成協議，避免爆發債務違約，消息帶動美股上升，三大指數均向上，道指雖然尾市升幅收窄，但仍錄得337點升幅；標指跟納指則別升36及152點。
美國兩黨達成債務協議，將債務上限提高至4800億美元，政府至12月初均能避免債務違約風險。不過10年期美國國債孳息繼續向上，升至1.574厘，為今年6月高位。債息持續向上，反映市場對通脹只係暫時性嘅講法存疑。一旦通脹壓力證實比預期中持久，加息步伐將加快，有分析指今年美國10年期債務將升至1.85至2厘。而持續嘅通脹或引發債券跟股同步下跌，從而令嗰利用固定收益證券嚟保護投資組合免受股市下跌影響嘅投資者感到兩難。
至於港股暫時隨美股反彈，伹得留意升勢都集中重磅藍籌股，而早幾日北水一直放假，成交當然未能配合升勢。至於今日港股預咗會借勢再挾淡倉，亦預期恒指可重返20日線(24724)，但能夠企穩又係另一回事。睇返過去一個月，期指每一次反彈，即使能重越20日線，但多次均未能重返50日線之上，目前50日線喺25480點，即25500水平，係港股能否扭轉弱勢嘅關鍵。
其實港股呢一輪嘅跌浪，主要由恒大(03333)事件、內地監管風暴，以至近日嘅限電等因素所困擾。而內地嘅「能耗雙控」政策確立全球供應鏈重組趨勢，從具體行業嚟睇，受到「雙限」政策影響較大嘅行業包括但唔限於鋼鐵、電解鋁、水泥、化工化纖4大行業。呢啲行業主要特徵是高耗電跟高碳排，內地採取措施包括直接停產、削減產能(20至90%不等)、錯峰生產、分時段限電、削減用電優惠等。能源短缺跟工業產能大減使中國面臨經濟下行壓力，導致經濟增長預估值下調，策略上喺限電政策未解除，呢幾個板塊加埋內房股都係避之則吉。
暫時港股只能視作反覆上落市，移動區間則已下移至23500至25000水平，除非港股能重返50日線水平之上並企穩，否則暫難言轉勢。而投資者手上仍持有ATM等重磅指數股，好趁呢兩日反彈減持，呢段持間只宜高沽低買，加上今日星期五，更宜忍手，不宜買貨。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。