港股繼續區間上落暫仍未有方向
12月10日，日間部份時間天色月朗，早晚有一兩陣微雨，下星期氣溫顯著下降，大家記得著多件衫喇。美股隔晚表現反覆，疫苗利好消息漸被市場消化，市場同時關注新一輪紓困方案進展。美股三大指數齊創盤中新高後回落，尾市沽壓較明顯，道指仍守住三萬關，跌105點，報收30068點；標指則跌29點；納指跌勢較顯著跌近2%，報收12338點。
美股調整拖累夜期跟ADR回軟，目前恒指喺新加玻黑期於26300水平徘徊，又重返10日線( 26603)及20日線( 26512)之下。市場再有聲音指全球央行大量印鈔，或製造一次海嘯級嘅債務危機，不過正因為資金泛濫，逼使資產價格上升，面對極度寬鬆嘅流動性，以持續財值嘅貨幣來衡量，資產價格勢難下跌。而細摩亦睇好明年股市表現，指明年股票需求將會增加約6,000億美元，供應則會減少5,000億美元，一加一減將合共為明年股市帶來1.1萬億美元提振。
雖然大戶仍睇好美股前景，但全球社交媒體霸主Facebook被美國聯邦貿易委員會(FTC)起訴，指控該公司涉嫌非法壟斷，Facebook或面臨拆骨遭遇，股價收市跌1.93%。較早前內地亦就科技巨企涉嫌壟斷提案，睇嚟未來重量級科技巨企，將會持續面對相關壟斷指控，或未能繼續透過收購競爭對手壯大及擴充業務。
港股繼續迷失方向，恒指連跌兩日後噚日反彈，暫時處於窄幅橫行格局，只要大市唔跌穿26000至26100點，港股未見得會顯著下跌，但27000點阻力一直未能突破，港股亦唔見得有資格開始新一輪升勢。雖然中美關係仍然緊張，甚至喺侵侵再出招針對內地企業，及制裁中國官員，確曾為港股帶嚟些微震盪，不過調整幅度只係由26900水平跌至26200水平，可見市場未見太慌張，資金仍然喺不同板塊輪動，於新舊經濟之間穿梭。
自內地對科技巨企提反壟斷提案後，確係有資金從相關科技巨企流出，JTAMX近日只有小米(01810) 股價及相關新聞 表現較標青，預期呢幾隻巨無霸呢期需要整固，或於空間內上落，資金反而流向其他股份如電動車股、軟件服務或內需消費股。其實近期人民幣匯價持續高企，相對美元表現更加穩定，足以吸引更多資金買入中國資產。
而明年預期將會有海量中資股及中概股來港上市，港股表現仍可睇高一線。而港交所(00388) 股價及相關新聞 當然係最受惠股份，其股價於360至400元已上落已接近一季時間，只要明年港股keep住新股集資活動活躍，港交所亦會水漲船高，不妨喺港交所回調至移動區間底部，即360元水平收集，作為中長線投資，港交所係JATMX以外另一必選股份。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。