港股｜8月3日，大致天晴，天氣酷熱，稍後局部地區有驟雨。美國被惠譽下調長期信用評級至AA+，美股借勢下調，但相對其他股市，美股已算克制，道指跌348點，跌不足1%；標指跌1.3%或63點；納指跌逾2%，跌310點。VIX升至16.48，已逼近17-18，即市場情緒扭轉嘅分界線，一旦升穿呢個水平，要小心美股出現較大幅度調整，畢竟美股累計升唔少，目前估值上偏高。今晚輪到蘋果公司公布業績，市場都預咗Q2業績都係一般，亦已消化iPhone收入下跌，問題係市場接唔接受30倍以上PE嘅蘋果公司。
目前已有超過一半嘅標普500指數成份股公布咗業績，超過八成公司超出預期，整體倒退率亦好過預期，反映美國經濟維持強勁，並未有出現預期嘅衰退。而7月份小非農就業人數增加32萬人，遠超於預期嘅19萬人，連續四個月超出預期。疫情後復常令出遊人數大增，需求上升帶動酒店、餐飲業擴張，休閒及酒店業新增職位再次表現強勁。
惠譽下調美債評級，令資金變得保守，美匯指數由99.5升回102.6，美元轉強人民幣由7.11回落至7.20，人仔又復轉弱，中概股亦腳軟，隔晚金龍指數跌逾4%，夜期跟ADR雙雙向下至19,400水平尋找支持。睇返呢幾日中概股嘅走勢，急升急跌，忍唔住高追又秒變韭菜，呢啲波幅根本難以令人買咗貨可以安安樂樂咁坐定定，港股仍然係上落市，咁嘅走勢，係好難吸引到長線資金入場。
港股目前估值偏低
雖然港股目前估值係偏低，但都吸引唔到長線資金入場，只係炒消息嘅短線資金喺場內彈出彈入，長期成交低迷。雖然上月底阿爺又話要救市，但又係打嘴炮呢一招，無奈真係無資金配合，亦唔見有具體政策出台，呢啲口水政策市嘅升勢難以持久，港股仍然維持上落市格局。
個股方面，恒大系嘅股份，逐隻排隊復牌，似乎阿爺真係唔想恒大就咁仆街，銀行繼續借錢畀恒大，只要能夠還到利息，銀行自然唔需要將恒大嘅債務撥入壞帳，以債冚債雖未能做到，但見步行步先以息冚債，為恒大續命。恒大目前係中國甚至全球嘅最大債仔，單係拖欠供應商嘅債務已達一萬億元，黑心講句，只要呢一萬債主嘅供應商死一半，恒大變相債務減少5,000億元，若然能成功復牌再透過喺市場上集資，當然係仲有傻仔肯落搭先抽到水，咁恒大就有機會死唔去。只要恒大死唔去，就唔會拖死埋內銀。
港股由18,500點反彈至20,400水平回調，目前落到100日線及10日線附近，即19,400至19,500水平，若然呢個水平失守，大市有機會繼續向下考驗其他移動平均線，不過一旦能夠守住全部平均線並作整固，後市仍有望再一次挑戰日線保力加頂部突破向上，只係資金不足問題未解決，加上呢個星期一至星期三日線圖出現嘅三枝陰燭令走勢出現逆轉，似乎港股都係難以走出喺保力加通道內上落嘅格局。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。