9月14日，多雲有雨及雷暴，雨勢有時頗大。隔晚美國公布CPI，雖然高過預期，但美股個別發展，整體都算企得穩，道指只係跌70點，標指跟納指分別升5點及39點。目前標指企守4400，喺4400-4500之間高位整固，市場觀望等待下周三議息結果。美國8月CPI同比上升3.7%，略高於預期3.6%，核心CPI同比增長4.3%，跟市場預期一樣，環比增長0.28%，高於預期。CPI回升，主要係去年8月基數急降，低基數效應下出現大增。環比增長較大主要係期內油價上升，令能源環節環比增長5.58%，拉升整體CPI，扣除能源後核心CPI環比只增長0.28%，略高於預期，主要係交通運輸升幅達1.96%所致，其他環節通脹又唔算勁。油價由7月初70美元邊反彈至最近接近90美元，只要油價急彈情況扭轉，理論上今年餘下時間嘅CPI唔會再向上。
估計嚟緊核心CPI環比升幅會回落，主要房租已經連續五個月下跌，估計房租向下趨勢，有機會慢慢拉低核心通脹，美聯儲比較着重核心通脹，尤其係核心PCE。連環加息已打擊借貸需求增長，房價因需求減少回落，租金正在下降，不過5月後美國樓價回升，估計房租喺第四季會會見底回升。幸而二手車需求下降，車價環比再跌1.23%。另外食物環比增幅為0.23%，保持穩定，同比係已經連跌12個月，預期咁嘅情況下，CPI唔會再大幅反彈。換句話講通脹已受控，理論上息口應該見頂，目前係要留意工資及工業生產復甦下，通脹會否再度回升。
人民幣反彈，中概股企穩，只係成交淡靜，有大行又唱淡A股，指A股股市內有太多造假公司，呼籲投資者遠離，反映外資對中企已失去信心，暫時無法挽回，短期外資都唔會重返中港股市。港股喺萬八點苦守幾日，已幾次挑戰20日線不果，睇返噚日成交額不足800億元，資金遠離港股意向相當明顯。港股持續欠缺成交，只有繼續陰乾。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。