港股缺水繼續上落市悶局
8月8日，大致多雲，有驟雨及狂風雷暴，下午短暫時間有陽光。上周五美國公布嘅非農數字遠超市場預期，美股低開後回升，道指升76點；標指跟納指則分別跌6點及63點，上升動力已見減弱。不過市場情緒維持樂觀，VIX更回落至超過3月個低位。值得留意係資金開始轉向炒作次一線股份，小心音樂椅遊戲隨時暫停。
強勁就業數據，造就聯儲局仍有條件加息，市場亦相信下月聯儲局加息0.75%機會超過六成，而年底息率厔3.5%嘅機會接近五成。近期支持美股反彈主係炒作明年息口回落，10年債息回落至2.75%，明顯係市場炒作明年息率不加反減。市場炒作明年減息，主要係認為美國經濟有機會衰退，近日唔少企業已表示暫緩擴張，甚至縮皮裁員，就係為咗未來經濟可能陷入衰退作準備。
港股缺水問題仍嚴重
市場除咗炒作聯儲局明年減息之外，美元強勢促使資金流入美元資產，美股自然亦跑贏其他市場。強美元令新興市場資金流走壓力大增，連歐元區亦面對重重壓力，美匯指數稍為回落至105，確令歐元暫時鬆一口氣。面對高通脹但企業盈利倒退同時出現，歐央行採取嘅行動係一邊加息，一邊增購個別地區債券，以減低企業融資壓力，只係一旦美匯指數再度回升，歐元區嘅企債危機將再度升溫。
至於A股跟港股，投資者情緒同美股剛好相反，上周因為台海局勢升溫，令恒指周初回落至二萬水平之下，其後總算有驚無險，港股周末前又重返20000水平之上，總結一周仲有幾十點進帳。只係成交額繼續偏低，港股缺水問題仍然嚴重。即使阿里(09988)交出一份優於市場預期業績，阿里績後喺ADR表現如何威猛，但至翌日返到去港股時段，竟然係高開低走，全日捱沽，最終更倒跌2.2%收市，呢個好明顯係港美兩股市，資金充裕跟缺水嘅分別。雖然港股喺現水平，唔少股份經過一輪調整下，現價已重現吸引力，但未有資金流入，低位亦唔見有大戶買貨。而北水亦已任性不再，採取高沽低買策略，令港股只能直處於上落市嘅悶局之內。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。