港股缺資金流入 短期難有大突破
11月16日，天晴，部份時間有陽光，天氣稍為和暖。隔晚美股微跌，三大指數回返少，道指跌12點；標指跟納指跌分別跌1點及7點。目前美股仍然高位徘徊，但大摩發表報告，指隨住貨幣寬鬆政策影響力減少，加上目前唔少企業估值高企，預測明年美股或跑輸歐洲及日本等，通脹壓力較細嘅市場。不過市場對於美股高企嘅聲音少有理會，EPFR統計顯示，儘管美國通脹高企，上周美股基金淨流入73.25億美元，為連續7周資金淨流入，更已連續5週稱霸全球，本年累計淨吸資逾3400億美元。
美股繼續旺場，港股則持續呆滯，喺中美元首舉行視象會議前，港股無乜方向。不過市場都打定輸數，預咗今之習拜會唔會有乜嘢突破，之前市場仲估緊關稅方面可能略為放鬆，但有消息指今次雙方會議，未必會傾到關稅問題，而雙方分歧實難喺一次會談就講掂數，估計今次會議唔會帶畀市場乜嘢驚喜。
為抗衡中國科技崛起，美國早前提出包括振興境內半導體生產工業在內《美國創新及競爭法》（USICA）。該法案今年6月在參議院通過，眾議院卻遲遲未批，原因是議員打算自行草擬另一版本的法案。日前有道指，中國最近幾星期一直對美國官員、企業高層等進行游說，要求修改USICA內容，並威脅警告如果相關USICA正式通過立法，美企將面臨在中國市場佔有率或營收減少風險。呢個抗華科技法案，或延至明年表決。總括嚟講，中美雙方嘅科技戰跟貿易戰，暫時仍會持續，而喺未有任何利好消息之下，港股暫時舉步為艱，估計將於25000至26000點之間上落。
個股方面，資金似乎開始從新配置科網股，市場憧憬內地監管已屆尾聲，估計相關重磅科網股，應該見咗底，只係反彈至現水平，又逼近啲較大嘅阻力位，未有貨又想上車，唯有分段買入，始終整體大市表現仍反覆，估計相關股份會跟隨大市上落，並唔會出現一枝火箭咁嘅升勢。相反之前受資金追捧嘅環保概念新能源相關股份，似乎有資金流走，市場轉軚配置科技股，令新能源股呢唔多精神。資金喺不同板塊流轉，反映入場資金有限，喺缺水情況下，繼續塘水滾塘魚，港股要進一步突破，非得成交配合方能水到渠成。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。