8月1日，部份時間有陽光，間中有幾陣驟雨，局部地區有雷暴，日間天氣炎熱。美股隔晚靠穩微升，市場觀望嚟緊公布嘅就業數據及蘋果公司跟亞馬遜業績，三大指數保持升勢，整個7月份，道指跟標指累漲3.4%及3.1%，納指更升逾4%，標指跟納指已連升5個月。市場憧憬息口快將見頂，市場風險胃納持續高企，美股暫時睇唔好太大回調風險，主要係已公布業績嘅美企，都能夠交出一份令市場滿意嘅成績表。不過唔少重磅科技股去到現水平，估值相對唔便宜，現價去博向上空間或有限，美股即使唔似有顯著回調，亦難再大幅向上。
至於港股上周初跌至18500水平後，急速逆轉跌勢並由低位反彈接近1500點，噚日更重返20000水平，更突破6月高位，創20361兩個月高位，全日成交額1825億元，係近日罕見嘅高成交額水平。自內地政治局會議釋出積極刺激經濟訊號後，北水確有大量流入，不過噚日又出現淨流出，港股升後回吐，但仍保20000大關，港股總算維持強勢，但資金對港股仍有保留。
睇返啲內地數據，內地最新7月份官方製造業採購經理指數(PMI)為49.3，稍高於前值的49及市場預期48.9；7月份非製造業PMI為51.5，遠低於市場預期53，連跌4個月。數據未見起色。由於經濟數據唔理想，市場繼續憧憬有更多救市措施出台，比想像中好嘅係，喺政治局會議完結後，多方部門表明會配合支持政策。只係目前未見實際政策出台，投資者仍半信半疑。
究竟阿爺仲可以點出招，出乜嘢招，暫時政治局所講嘅，都係老新常談，政策層面嚟講，未見有乜睇頭，今次嘅救市行動，帶動大市急升係快嚟快去，抑或真正能令中港股市逆轉勢，睇埋呢個星期自有答案，但講到尾最緊要係有成交配合，能夠持續地每日成交都保持1500億以上，而指數回吐能夠守住19800-20000點，後市仍可以繼續向上挑戰21000水平。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。