港股若成交持續萎縮 恐陷入陰乾下跌局面
8月1日，天晴，局部地區有驟雨，日間天氣酷熱。美股上周五續升，美債息回落令市場資金持續risk on，即使多間美企業績公布未如理想，並調低下季甚至全年預測，但市場視之為無物，資金喺投資情緒高漲下，仍然湧入股票市場，情況跟6月時港股表現相近。即係實質經濟情況未見改善，但資金湧入股市，結果7月份一切打回原形，今日甚至將失守二萬大關。美股喺7月份反彈逾一成，同時GDP連續兩季出現負增長，美國經濟已有步入衰退之嫌，美股喺8月份能否保持升勢，古天后對此有所保留。
至於港股8月步入業績期，今日由大笨象(00005)打頭陣，將會派發上半年成績表，預期喺資本水平面臨下降情況下，大笨象將維持派息。受惠美國啟動加息周期而帶動港元拆息(HIBOR)抽升，滙控淨利息收入亦料有所增長，但股市疲弱，財富管理銷售疲弱，以及英鎊跟人民幣匯價疲弱因素，可能抵銷拆息上漲嘅利好因素。
除咗派息之外，市場較為關注係回購計劃會否重啟，不過今年首季大笨象已預告今年難再出手回購，加碼回購應該機會不大，但摩通認為喺中期資本趨勢仍允許集團每年進行10億至20億美元回購計劃。另一方面，市場關注今次業績嘅內地業務貸款質素，因中港兩地唔少銀行均有涉足內地房地產貸款業務，爛尾樓事件會否引發相關業務撥備增加風險。
另一個市場焦點，應該係有關阿里巴巴(09988)喺美國嘅退市風險，繼旗下餓了麼跟美團(03690)齊遭內地監管部門約談後，美國證交會(SEC)上周五再將5家中資企業列入「預定除牌名單」，阿里巴巴亦榜上有名。雖然市場對此早有心理準備，但當真正要對退市，股價失去紅底身份後，估計90元大關亦難保。
恒指回落至二萬水平留下，開始重現值博率，重磅科網股，京東(09618)可吼230元左右分段買入，美團(03690)則吼170元水平上車。不過喺成交欠奉下，港股要重拾動力似乎亦有難度，最怕係成交持續低迷，港股可能會步入陰乾下跌尋底嘅困局。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。