港股萬九水平之上反覆整固
12月13日，多雲，間中有一兩陣微雨，早晚相當清涼。美股繼續反覆，市場等待CPI公布，美股三大指數隔晚反彈，道指升528點；標指跟納指分別升56點及139點。標指繼續守住3900呢個重要支持位，今晚公布嘅CPI數據，睇睇核心CPI降速如何，暫時市場普遍預期周四聯儲局將加息0.5%，美股仍然喺高位整固，但臨近聖誕節長假，市場變得更為保守審慎。
周四聯儲局議息，加息0.5%已無懸念，會後議息聲明或為未來息口路徑提供更清晰指引，暫時局內分成兩派，鷹派支持繼續加息以防通脹回升；鴿派則認為通脹已見頂回落，需要放緩加息步伐，以防經濟硬著陸。其實兩派都有一個共通點，就係息口都係由通脹主導。至於目前10年期債息跌至3.4%，反映市場對後市息率走勢甚為樂觀，並以息率升至5%見頂，並於明年開始掉頭減息。只係10年債息回落，但未見對息率最為敏感嘅科技股回升，反而科技股一直落後，主要係相關企業除咗不約而同裁員之外，蘋果公司跟Tesla等對來年銷售預估保守，兩股股價仍在近月低位橫行。科技股未能如傳統股般反彈，仍然係估值問題，若然未來業績不似如期，自然難以支持股價高企。
中港股市仍然炒緊通關消息，由於高鐵已恢復由聖誕節開始嘅列車時間表，市場憧憬中港際地通關在即，不過中概股未見有反應配合，隔晚反映中概股表現嘅金龍指數逆市走低，而港股呢邊嘅科網股亦回吐。A股經過上月大幅反彈後，資金未肯再高位追貨，市場變得保守，噚日深滬兩地股市成交跌穿一萬億元，通關消息已未能進一步將中港股市推高，呢個消息炒咗咁耐，市場已消化呢個所謂利好消息。
至於港股早已順利達到古天后原先估計嘅目標19500，並已超額完成嘗試挑戰20000大關。目前再追貨已乏值博率，有平貨喺手可以持，去槓桿亦係合理做法，預期港股喺呢個月內餘下時間，能做喺19000水平之上高位整固，下月已有條件繼續向上，大前題係成交需保持暢旺，每日成交能做到1500億或以上，已經唔錯。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。