港股萬五好淡攻防戰 淡友暫仍佔上風
10月25日，天晴，天氣乾燥，有時風勢頗大。隔晚美股繼續借業績反彈，道指跟標指齊齊升逾1%，留意標指已反彈至阻力區，能否更上一層樓，今個星期陸續公布業績嘅科技龍頭表現如何，將會係關鍵。不過單睇納指呢幾日嘅表現，反彈力度係遠遜於道指跟標指，皆因高息之下，科技股股價難以高企，納指表現自然遜色。
美國經濟陷入衰退已是不爭事實，美企減少支出，裁員縮皮等消息不絕，收入增長亦放緩，上周Snap公布業績收入正正係低於預期，同時虧損擴大，令股價喺業績公布後，股價盤後大跌27%。至於本周公布業績嘅Google跟Meta等龍頭，已被大行大幅下調預測，出嚟結果係點，要睇睇市場反應。
至於息率仍然係主導市場嘅重要因素，11月加息0.75%已無懸念，至於12月加息0.5%係合理預期，除非油價再大幅上升，否則油價喺80美元水平徘徊，CPI增速料放緩，通脹料可見頂。不過要控制住通脹，估計明年上半年減息無望，可能最快要去到2023年下半年，甚至2024年先有望減息。本周四美國將公布CPI，喺高息環境下，經濟放緩速度或加快，不過失業率維持低水平，呢個係美國嘅優勢。相反歐洲跟英國情況就較，喺息口高企下，或較容易出現流動性危機。
至於港股真係無嘢好講，噚日全球股市就只有中港兩地股市插水，外資大手沽出A股，港股同樣喺大成交下插逾千點，雖然反映低位有資金入場接貨，但呢啲位外資仲博命沽貨，要有心理準備，外資把心一橫沽出中港股票，可能一段時間唔會回頭。不過外資狂沽嘅同時，北水接貨，都總好過繼續陰乾。不過恒指單日跌6%以上，過往都會迎來一下較強勁嘅反彈，只係今次沽貨嘅係外資，北水唔見得有本事可以完全抗衡，睇嚟港股今日未必出現3月份嘅急跌6%後強勁反彈，反而係喺14800至15000呢個大位，好淡嚟一場攻防戰。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。