港股萬八水平高位反覆整固雖然幣市因為FTX爆煲單嘢仲係死死吓，但美股跟虛幣市場嘅關連系數近大半年低咗好多，只係科技股表現較受拖累，但VIX已回落至24水平之下，市場整體情緒仍偏好，只係VXN仲高企於30之上，科技股自然表現較差。
至於港股方面，噚日成交超過2000億元，恒指亦從上月低位反彈逾兩成，嚟到18000水平，睇嚟都要抖抖氣。現水平再追貨嘅值博率已大減，雖然成交保持暢旺，但資金已傾向追較落後嘅股份，所以見到內房物股呢類跌到內部傷殘嘅股份呢幾日勁升。碧桂園(02007)係唯一未有出現過違約嘅示範內房民企，一趁股價爆升，又嚟批股抽水集資38億元，其實都係正常做法。若然今日仲守得住批股價，反映市場對內房股嘅恐懼已消退，但內房嘅債務問題尚待解決，加上上方蟹貨重重，無貨喺手都係食下花生算數。
越秀交通(01052)，公司全資附屬公司將以總代價人民幣10.98億元，向其母公司廣州越秀集團股份有限公司收購喺中國河南省經營蘭尉高速公路的公司之100%股權。標的路產全長61 公里，雙向4 車道，剩餘年限約13 年，今年1-7 月實現營收1.98 億元，除税前盈利約3430 萬元。蘭尉高速已運營17 年，係成熟路產，購入後即時可實現盈利。2021 年蘭尉高速公路全年收入約3.09 億元，除税前淨利潤約3600 萬。今年路產盈利能力進一步提升，1-7 月實現營收1.98 億元，除税前盈利約3430 萬元，反映項目收購即有盈利，且內部回報率高。
收購後，公司承接蘭尉高速嘅負債約14.5 億元，預計收購完成後公司資產負債率從48.4%上升至52.5%，財務穩定性基本唔太受影響。公司披露本次收購嘅內部回報率預期達9.5%，超出市場類似交易嘅平均回報率水平，預計公司今年年末或明年年初已經能夠實現對該路產嘅並表。
收購蘭尉高速符合公司喺中國中部發展嘅明確策略，公司相信蘭尉項目能夠持續受惠於「促進中部崛起」戰略以及中原城市群、鄭州大都市區建設等區域規劃，持續為公司帶來盈利淨貢獻。喺戰略部署上，越秀交通基建去年分拆湖北漢孝高速公路發行REIT上市後，蘭尉高速收購可補充上市公司資產組合，提升股東價值。越秀交通基建股東特別大會將於11月18日舉行議決收購河南蘭尉高速，有貨嘅股東不妨留意一下，同埋應該投票支持呢項收購。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。