港股落後中美股市幾十條街
7月22日，雨過天青，部份時間有陽光，局部地區有驟雨，日間天氣炎熱。美股連彈兩日，隔晚三大指數續升，道指升286點；標指跟納指分別升35點及133點。市場對經濟前景仍感樂觀，話咗周一急挫又話擔心變種病毒令經濟再度停擺，都係股市跌完先搵個理由解釋。繼續有對美股後市信心十足嘅分析，細摩美股策略主管更將標指年底目標由4400點上調至4600點，並睇好企業盈利前景，股市將受惠企業增加回購，以及較低嘅利率及消費者信心增強。至於港股ADR及夜期回升，暫時恒指仍守250日線，相對美股跟A股，港股呢期表現特別弱，港股落後十條街。
之前就話港股跟A股唔跟美股走，美股再強港股亦跟唔上，不過近日A股氣氛好轉，滬深股市兩融佽額更頻頻突破1萬億元人仔，但可惜無助港股表現，恒指喺250日線爭持，27000關岌岌可危。港股弱過藥煲，講到底都係中資科企插水累事，喺美國制裁兼內地加強管制兩面夾擊下，重磅科網股弱勢已成，北水唔單止未有趁低吸納撈貨，反而加大減持力度，拖累恒科指同時亦限制恒指動力。
內地對各產業監管不絕，頭號打壓對象當然係科網股，尤其掌握大數據嘅平台股，手上數據足以左右國家安全，阿爺要管好合理，但就苦了高追坐艇一倉蟹貨嘅股民。除咗科網股之外，另一個阿爺今年主力規管嘅範圍係房地產，皆因阿爺一直強調住房並非商品，壓抑樓市炒風，體現房住不炒係阿爺重要指導。
中美角力加上疫情肆虐，各國都果斷放水求市，令全球債務飊升，放水容易收水難，各國如何擺脫海量放水而造成嘅槓桿陷阱，及避免資產泡沫突然爆破，令經濟重返增長正軌，成為各國主要對應問題。而內地樓市去槓桿漸見成效，配合當局為房企定下嘅「三道紅線」要求及「房住不炒」目標，上半年內地二手樓價已見大幅詰整，而全國樓市指標嘅深圳，截至6月二手樓價每方米價格較年初累跌15%，作為一線城市嘅樓價指標，有望指引全國樓價有序調整。
樓市泡沫受控，跟手解決房企債務問題，而一直係內房最重債嘅恒大(03333)，近日頻頻傳出財攻問題，最新消息係旗下樓盤的按揭批核問題，包括滙豐、渣打等銀行均停止為恒大旗下樓花買家提供按揭貸款，停供按揭僅涉及恒大兩個正在建設中嘅樓花項目，接近現樓項目則不受影響。呢個消息傳出，難免影響準買家購買恒大樓盤意欲，恒大如未能透過賣樓套現減債，都幾大鑊。睇嚟恒大嘅財政問題，將持續困擾整個內房板塊，影響內房股投資氣氛。不過物管股按理不受影響，但亦有物管股受恒大事件拖累下跌，其中世茂服務(00873) 兩個交易日無啦啦跌咗成幾兩成咁滯，都算無辜，股價如能守50日線(22.72)，其實有得博，公司有機會短期內發盈喜，業績下半年表現亦唔會令人失望，落到廿二三蚊呢啲位，正路有得博反彈。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。