港股行一步退兩步 成交欠奉一潭死水
7月29日，天晴，天氣酷熱，高溫持續，注意補充水份。美國第二季土GDP下降0.9%，已連續兩季出現負增長，技術上已步入衰退，美股先跌後回升，淡倉繼續被挾爆，道指升332點；標指跟納指分別升48點及130點，三大指數升逾1%。明明係經濟衰退，市場卻將之視為好消息，憧憬聯儲局放慢加息步伐，壞消息當好消息嚟炒，美股明顯短期市場氣氛熾熱，一如上月港股挾至22000水平，同樣係唔需要有理由。
美企公布嘅業績唔少都差過預期，相關股份同樣先跌後回升，市場無視利淡因素，主要係之前睇淡美股嘅人太多，以喺基金現金水平偏高下，淡倉一挾就急升，美股熊市真係咁快完？理智少少去諗，喺通脹仍然高居不下，聯儲局可以停止加息？甚至減返轉頭？呢啲都只係市場一廂情願嘅想法，不過市場情緒帶動下，美股樂觀得過份，若然根據有智慧不如趁勢呢個法則去參與炒作，就要小心控制風險，除咗注碼上唔可以進取，盡量短線操作，一旦見走勢逆轉要肯投降打靶，否則又係換嚟資金被套窂嘅下場。
馬雲先失阿里 再失螞蟻？
有消息指馬雲計劃放棄阿里旗下金融科技巨頭螞蟻集團嘅控制權，方案之一係將部分投票權轉移給手下如井賢棟。無論馬雲放棄螞蟻嘅動機如何，一旦呢個計劃落實，螞蟻嘅上市計劃，睇怕只有再延期，之前幾度誤傳螞蟻重啟上市計劃，唔單止係狼來了，誤信消息追貨，怕且又成韭菜被割。不過有口痕友話，馬雲先失阿里，再失螞蟻，本身就係史上最大嘅一棵韭菜，一般小股民被割韭菜又算得係乜嘢。
至於港股呢邊，真係不提也罷，美股升又跟唔上，美股稍有震盪，港股就跌突，目前走勢係行前一步退兩步。成交萎縮，無新資金入場，睇嚟上月大市挾升至22000水平，唔少追入資金又被套死，市場購買力被消耗。港股一日唔解決缺水問題，就算唔再大幅下跌，維持上落格局，但只會係一潭死水。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。