11月22日，天晴，日間天氣乾燥，天氣和暖，日夜溫差較大。市場呢期都係炒美息見頂，美股連升多日，不過隔晚議息紀錄顯示，聯儲局官員維持偏鷹以抗衡通脹，喺經濟未顯著放緩前，高息環境維持不變，加上重磅股Nvidia公布業績後回吐，影響科技股氣氛，道指收市跌62點，標指及納指分別跌9點及84點，終止五連升。
雖然再有美聯儲委員出嚟放鷹，但美股大幅回吐，反映沽壓不大。其實喺通脹回落期間，美聯儲持續打嘴炮，目的係唔想通脹回升，但即使俄烏爆發戰爭，亦未見油價大幅向上，反而回落至77美元，事實上市場需求唔大，經濟見反彈不過未有沒熱，目前係點樣令美國經濟軟著陸唔陷入衰退，反而市場相信明年會減息，只係幾時減息同減息速度如何，呢個先係明年美股炒作重點。
標指4600係較大阻力區，估計由4300水平之下反彈至現水平會較為反覆，歷史高位喺4800水平，目前只差不足6%破頂，估計年底前有望升穿4600水平，但上破4800水平創新高，要待明年炒減息及企業業績交到數先有機會。Nvidia業績超預期，但預警大中華地區銷售會減少20-25%，盤後一度大跌6%，現時收窄至只跌1.5%，可見美股買盤有幾積極，逢低吸納有幾大強度。
標指VIX 回落至14，但10年息仍然喺4.4%偏高水平，證明債市空軍未完全退兵，睇嚟係一邊頂住個債息一邊減倉。留意11月開始美國企業債進入再融資高峰期，債市空軍都係想借呢個機會發圍。不過英、德、日債息持續向下，未來一年息口向下係大趨勢。
至於港股整體氣氛係有轉好跡象，但要再向上突破並企穩萬八大關，需要更多資金流入，外資一去不回，已唔使旨意佢哋短期回頭，目前只有寄望阿爺之前加碼放水1萬億，能夠帶起A股，甚至惠及港股。
阿爺再開到口要幫內房企業「理想地」再融資，內房噚日相當興奮，但內房企業銷售唔理想，再融資都只係債冚債。中港股市入場資金唔係話完全無，只係入場炒作只有短錢，春江鴨借消息炒高又係想割散戶韭菜，大戶根本無打算再坐一會，持貨耐少少都唔願，一味短炒割韭菜，久而久之，散戶亦唔願再入場作無謂犧牲，惡性循環，令場內資金面薄弱。港股低位可儲，但資金有限只炒個別，一嚿錢落場，股價炒高如小米(01810)，升到咁上下就有獲利盤減持，資金輪動轉炒其他股份。暫時見小米嘅回吐壓力又唔算太大，能夠守喺15元水平已算唔錯，只係無新資金再入場，向上動力不足，但至少唔係之前嗰種狂掟貨不斷穿底，呢個係港股氣氛已見改善嘅證明。
噚日港股昨日高開低收，有大行大幅下調恒指明年目標價，由21260點調低至19890點，明年目標竟不足二萬，實在令人心灰，抵消人民幣升值嘅利好因素，恒指噚日收市倒跌44點，隔晚ADR再跌86點收17647點，今早黑期跌幅相若，預恒指低開有機會回試17600關支持，同時亦係10日線及50日線附近，失守下試上移至約17483嘅20日線，上方阻力下移至17800，今日預計窄幅上落，收窄三角形等待爆邊。
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。