港股趁北水假期反彈 暫難擺脫提款命運
9月29日，大致多雲，有驟雨及幾陣狂風雷暴。隔晚美股反彈，多得英倫銀行緊急買債嘅消息，令市場憧憬央行開始救市，刺激歐美股市反弓，道指跟標指升逾1%，納指更升超過2%。美匯指數仍然高企，英鎊跌到唔識停，兌美元一度下試1.06水平，為穩定英鎊匯價，英倫銀竹宣布喺未來兩星期人月會緊急「無限買入長債」，係全球第一間央行喺縮表期同時，又買入長債嘅地方。市場視英倫銀行呢個為救市舉措，美國10年期債息由4%水平，急急回落至3.74%，美股乘機反彈。雖然英倫突然買債，目的係穩住英鎊匯價，但縮表計劃持續，明年減持8380億英鎊嘅縮表計劃未有變，環球資金收水嘅大方向持續。
尤其美匯指數高見114水平，美國收水下環球資金回流係大勢所趨，資金流走，人民幣跌至7.26，正式跌破7.2關口，走勢較預期快。人仔下跌令人民幣資產吸引力下降，A股雖然有傳聞指中證監指引喺二十大前唔好沽貨，A股星期二因為呢個禁售傳聞勁彈，不過周三已打回原形，主要係市場未見有新資金流入，A股反彈亦只有曇花一現。
至於港股喺噚日跌至17185低位，淡友壓低轉倉姿態明顯不過，不過正正因為壓至低位轉倉，唔排除結算後，10月初段有反彈。加上呢兩日見成交有所回升至逾千億元，再唔係之前陰乾模式。隔晚夜期跟ADR反彈至17600水平，其實只係回補噚日日間嘅跌幅。其實港股跌至18000水平之下，唔少股份已跌至合理甚至吸引水平，問題係喺無新資金流入下，港股反彈力度亦有限，唔排除呢幾日北水休市彈高些少，北水返嚟見啲價靚仔咗，又出手減貨，港股都只不過係中外資金嘅套現提款機
古天后
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
版權聲明:
本網站所載的資料（包括但不限於所有文字、數據或其他資料的匯編），除註明外，皆受香港特別行政區政府知識產權署的版權法條例所保護。D's Consultant Limited（包括文章作者）在任何時間皆持有本網站版權所有的權利，包括所有版權利益與其他知識產權。任何人如被發現有任何形式之侵權行為，本網站保留向侵權者索償或提出檢控之權利。詳情請向香港特別行政區政府知識產權署查詢。